વલસાડ: દક્ષિણ ગુજરાતમાં મેઘરાજાએ વિનાશક બેટિંગ કરતાં જનજીવન અસ્તવ્યસ્ત બની ગયું છે. ઉમરગામમાં માત્ર 24 કલાકમાં 36 ઇંચ વરસાદ નોંધાતા રાજ્યમાં સિઝનનો સૌથી વધુ વરસાદ નોંધાયો છે. કપરાડામાં 29 ઇંચ, નાના પોંઢામાં 26 ઇંચ અને ધરમપુરમાં 20 ઇંચ વરસાદ ખાબકતાં સમગ્ર વલસાડ જિલ્લો પાણીમાં ગરકાવ થઈ ગયો છે.
ભારે વરસાદથી ઔરંગા નદી ભયજનક સપાટીએ પહોંચી છે, અનેક માર્ગો બંધ થયા છે અને નીચાણવાળા વિસ્તારોમાંથી લોકોને સુરક્ષિત સ્થળે ખસેડવામાં આવ્યા છે. સુરત, નવસારી, વલસાડ અને તાપી જિલ્લામાં પણ ભારે વરસાદથી જનજીવન પર વ્યાપક અસર જોવા મળી રહી છે, જ્યારે અનેક શાળા-કોલેજોમાં રજા જાહેર કરવામાં આવી છે.
પરિસ્થિતિની ગંભીરતાને ધ્યાનમાં રાખી રાજ્ય સરકારે બચાવ કામગીરી તેજ બનાવી છે. મુખ્યમંત્રી ભૂપેન્દ્ર પટેલના માર્ગદર્શન હેઠળ નાયબ મુખ્યમંત્રી હર્ષ સંઘવી સહિત ઉચ્ચ અધિકારીઓને અસરગ્રસ્ત જિલ્લાઓમાં મોકલવામાં આવ્યા છે. હવામાન વિભાગે દક્ષિણ ગુજરાત માટે રેડ એલર્ટ યથાવત રાખી આગામી કલાકોમાં પણ ભારેથી અતિભારે વરસાદની આગાહી કરી છે.
