ક્ષિપ્રા ઘાટો અને મહાકાલ મહાલોક રોશનીથી ઝળહળી ઊઠ્યા; 25 હજારથી વધુ સ્વયંસેવકોએ માત્ર 3 મિનિટમાં દીવડાં પ્રગટાવ્યાં
વડાપ્રધાન નરેન્દ્ર મોદીના 76મા જન્મદિવસ નિમિત્તે મધ્યપ્રદેશના ઉજ્જૈનમાં ભવ્ય દીપોત્સવનું આયોજન કરવામાં આવ્યું હતું. ક્ષિપ્રા નદીના વિવિધ ઘાટો અને મહાકાલ મહાલોક ખાતે એકસાથે 33 લાખ 27 હજાર દીવડાં પ્રગટાવવામાં આવ્યા હતા. અધિકારીઓએ આ આયોજનને વિશ્વ રેકોર્ડ ગણાવ્યો છે.
‘આશીર્વાદ કા દીયા’ અને ‘સેવા સંકલ્પ અભિયાન’ અંતર્ગત યોજાયેલા કાર્યક્રમમાં ગુરુવારે સાંજે 7 વાગ્યે સાયરન વાગતાં જ માત્ર ત્રણ મિનિટમાં તમામ દીવડાં પ્રગટાવવામાં આવ્યા હતા.
25 હજારથી વધુ સ્વયંસેવકોની ભાગીદારી
દીપોત્સવમાં 25 હજારથી વધુ સ્વયંસેવકોએ ભાગ લીધો હતો. રામઘાટ, દત્ત અખાડા ઘાટ, કેદારેશ્વર ઘાટ, સુનહરી ઘાટ અને ભૂખી માતા ઘાટ સહિત ક્ષિપ્રા નદીના ઘાટો તેમજ મહાકાલ મહાલોકમાં દીવડાં પ્રગટાવવામાં આવ્યા હતા.
દીવડાં પ્રગટતાં જ સમગ્ર વિસ્તાર ઝગમગી ઊઠ્યો હતો. ક્ષિપ્રાના ઘાટો અને મહાકાલ મહાલોકનું દૃશ્ય ભવ્ય દીપોત્સવમાં ફેરવાઈ ગયું હતું.
અયોધ્યાના રેકોર્ડ કરતાં 7.10 લાખ વધુ દીવડાં
અયોધ્યામાં 19 ઓક્ટોબર 2025ના રોજ 26,17,215 તેલના દીવડાં પ્રગટાવવાનો Guinness World Recordsનો સત્તાવાર રેકોર્ડ નોંધાયો હતો. ઉજ્જૈનમાં 33.27 લાખ દીવડાં પ્રગટાવવાના દાવા મુજબ અયોધ્યાના અગાઉના રેકોર્ડ કરતાં આશરે 7.10 લાખ વધુ દીવડાં પ્રગટાવવામાં આવ્યા છે.
જોકે, ઉજ્જૈનના આ નવા રેકોર્ડને Guinness World Records દ્વારા સત્તાવાર પ્રમાણપત્ર મળ્યું હોવાની માહિતી ઉપલબ્ધ નથી. તેથી હાલ તેને અધિકારીઓ દ્વારા વિશ્વ રેકોર્ડ તરીકે રજૂ કરવામાં આવ્યો છે.
મધ્યપ્રદેશમાં કુલ 3.55 કરોડ દીવડાં પ્રગટાવાયા
ઉજ્જૈન ઉપરાંત સમગ્ર મધ્યપ્રદેશમાં પણ મોટા પાયે દીપ પ્રજ્વલિત કરવામાં આવ્યા હતા. અધિકારીના જણાવ્યા મુજબ રાજ્યભરમાં કુલ 3.55 કરોડ દીવડાં એકસાથે પ્રગટાવવામાં આવ્યા હતા.
