વડોદરા: ડેડિયાપાડાના આમ આદમી પાર્ટીના ધારાસભ્ય ચૈતર વસાવા, તેમની પત્ની શંકુતલા વસાવા સહિત કુલ નવ આરોપીઓને કડક પોલીસ બંદોબસ્ત વચ્ચે વડોદરા સેન્ટ્રલ જેલમાં ખસેડવામાં આવ્યા છે. વન વિભાગના કર્મચારીઓ પર હુમલો અને ધમકી આપવાના કેસમાં અદાલતે તમામ આરોપીઓને સાત વર્ષની કેદની સજા ફટકાર્યા બાદ આ કાર્યવાહી કરવામાં આવી હતી.
નર્મદા એડિશનલ સેશન્સ કોર્ટના ચુકાદા બાદ આરોપીઓને જેલમાં દાખલ કરવાની પ્રક્રિયા હાથ ધરવામાં આવી હતી. વડોદરા સેન્ટ્રલ જેલ ખાતે પહોંચ્યા બાદ જેલ પ્રશાસન દ્વારા તમામ કાયદાકીય અને વહીવટી પ્રક્રિયાઓ પૂર્ણ કરવામાં આવી હતી.
- જેલના નિયમો મુજબ સૌપ્રથમ આરોપીઓના મેડિકલ ચેકઅપ કરવામાં આવ્યા હતા. ત્યારબાદ તેમની ઓળખ અને નોંધણી પ્રક્રિયા પૂર્ણ કરી કેદી નંબર ફાળવવામાં આવ્યા હતા. માહિતી મુજબ ચૈતર વસાવાને કેદી નંબર 90888 ફાળવવામાં આવ્યો છે અને હવે જેલ રેકોર્ડમાં તેઓ આ નંબરથી નોંધાશે.
જેલ પ્રશાસન દ્વારા તમામ આરોપીઓને જેલના નિયમો, શિસ્ત અને દૈનિક પ્રક્રિયાઓ અંગે માહિતી આપવામાં આવી હતી. ત્યારબાદ સુરક્ષા અને વહીવટી માપદંડોને ધ્યાનમાં રાખીને અલગ-અલગ બેરેક ફાળવવાની પ્રક્રિયા શરૂ કરવામાં આવી હતી.
આ કેસમાં ચૈતર વસાવા સહિતના આરોપીઓ સામે વન વિભાગના કર્મચારીઓ પર હુમલો, સરકારી કામગીરીમાં અડચણ અને ધમકી આપવાના ગંભીર આરોપો સાબિત થયા હોવાનું કોર્ટે પોતાના ચુકાદામાં નોંધ્યું હતું. સજાના કારણે ચૈતર વસાવાના રાજકીય ભવિષ્ય અને ધારાસભ્ય પદ અંગે પણ ચર્ચાઓ તેજ બની છે.
જેલ પ્રશાસન સમગ્ર મામલે નિયમ મુજબની કાર્યવાહી કરી રહ્યું છે અને તમામ આરોપીઓને જેલના નિયમો અનુસાર રાખવામાં આવ્યા હોવાનું સૂત્રોએ જણાવ્યું હતું.
