રાજકોટ: શ્રાવણ માસને ધ્યાનમાં રાખીને રાજકોટ મહાનગરપાલિકા (RMC) દ્વારા આજી નદીના રામનાથ મહાદેવ મંદિર આસપાસ વિશેષ સ્વચ્છતા અભિયાન શરૂ કરવામાં આવ્યું છે. શ્રદ્ધાળુઓને સ્વચ્છ અને સુવ્યવસ્થિત વાતાવરણ ઉપલબ્ધ કરાવવાના હેતુથી કોર્પોરેશને યુદ્ધના ધોરણે સફાઈ કામગીરી હાથ ધરી છે.
અભિયાન અંતર્ગત આજી નદીના પટ અને મંદિર આસપાસ એકત્ર થયેલો કચરો, પ્લાસ્ટિક તેમજ ગંદકી દૂર કરવાની કામગીરી કરવામાં આવી રહી છે. સમગ્ર વિસ્તારમાં સ્વચ્છતા જળવાઈ રહે તે માટે વિશેષ આયોજન પણ કરવામાં આવ્યું છે.
કાર્યની સમીક્ષા માટે કોર્પોરેશનના પદાધિકારીઓ અને અધિકારીઓએ સ્થળ મુલાકાત લીધી હતી. તેમણે ચાલી રહેલી સફાઈ કામગીરીનું નિરીક્ષણ કરીને જરૂરી માર્ગદર્શન અને સૂચનો આપ્યા હતા, જેથી શ્રાવણ માસ દરમિયાન કોઈપણ પ્રકારની અગવડતા સર્જાય નહીં.
રાજકોટ મહાનગરપાલિકાએ જણાવ્યું છે કે શ્રદ્ધાળુઓને સ્વચ્છ, સુરક્ષિત અને સ્વાસ્થ્યપ્રદ વાતાવરણ મળે તે માટે તમામ જરૂરી વ્યવસ્થાઓ કરવામાં આવી રહી છે. આગામી દિવસોમાં પણ શહેરના ધાર્મિક સ્થળો અને જાહેર વિસ્તારોમાં સ્વચ્છતા અભિયાન વધુ તેજ બનાવવામાં આવશે.
