રાજકોટ: જંગલેશ્વર વિસ્તારમાં હાથ ધરાયેલા ડિમોલિશન દરમિયાન થયેલા ખર્ચને લઈને ઉઠેલા વિવાદ વચ્ચે ભાજપના ધારાસભ્ય ઉદય કાનગડે પોતાનો ખુલાસો આપ્યો છે. તેમણે જણાવ્યું કે સમગ્ર કાર્યવાહી ટેન્ડરની પ્રક્રિયા મુજબ અને નિયમોને અનુસરીને કરવામાં આવી હતી.
ઉદય કાનગડે જણાવ્યું કે જંગલેશ્વરનું ડિમોલિશન શાંતિપૂર્ણ રીતે પૂર્ણ થયું હતું. આ કામગીરી દરમિયાન ફરજ પર રહેલા હજારો કર્મચારીઓ માટે ચા, નાસ્તા અને પીવાના પાણીની વ્યવસ્થા કરવામાં આવી હતી, જે ટેન્ડરની શરતો મુજબ કરવામાં આવી હોવાનું તેમણે કહ્યું.
તેમણે વધુમાં જણાવ્યું કે પાણીની બોટલોની ખરીદી અને તેનું વિતરણ પણ નિયમો અને ટેન્ડર પ્રક્રિયા અનુસાર જ કરવામાં આવ્યું છે. જો આ મામલે કોઈને ફરિયાદ કે શંકા હોય તો તેની તપાસ કરવામાં આવશે અને તપાસમાં કોઈ ગેરરીતિ સામે આવશે તો નિયમ મુજબ યોગ્ય કાર્યવાહી પણ કરવામાં આવશે.
જંગલેશ્વર ડિમોલિશનના ખર્ચને લઈને છેલ્લા કેટલાક દિવસોથી રાજકીય અને જાહેર સ્તરે ચર્ચા ચાલી રહી છે. આ દરમિયાન ધારાસભ્ય ઉદય કાનગડના નિવેદન બાદ સમગ્ર મામલે નવી ચર્ચા શરૂ થઈ છે.
