મુંબઈ: હિન્દી ફિલ્મ સંગીતની સુપ્રસિદ્ધ જોડી **’લક્ષ્મીકાંત-પ્યારેલાલ’**ના દિગ્ગજ સંગીતકાર પ્યારેલાલ શર્માની પત્ની સુનીલા પ્યારેલાલ શર્માનું 78 વર્ષની વયે અવસાન થયું છે. તેમના નિધનના સમાચારથી સંગીત જગત અને ફિલ્મ ઉદ્યોગમાં શોકની લાગણી પ્રસરી ગઈ છે.
પરિવારજનો અને નજીકના વર્તુળોમાં ‘અમ્મા’ તરીકે ઓળખાતા સુનીલાજીએ 12 જુલાઈએ પરિવારજનોની હાજરીમાં અંતિમ શ્વાસ લીધા હતા. ગાયિકા પ્રિયંકા મિત્રાએ સોશિયલ મીડિયા મારફતે તેમના નિધનની માહિતી આપતાં જણાવ્યું હતું કે, સુનીલાજી સાદગી, પ્રેમ અને પરિવાર પ્રત્યેના સમર્પણનું જીવંત પ્રતીક હતાં.
સુનીલા શર્મા જાહેર જીવનથી દૂર રહ્યા હોવા છતાં પ્યારેલાલ શર્માના જીવન અને સંગીત સફરના સૌથી મજબૂત આધારસ્તંભ હતાં. વર્ષો સુધી તેમણે દરેક સુખ-દુઃખમાં પતિનો સાથ નિભાવ્યો હતો અને તેમના લાંબા સંગીતમય કારકિર્દીના દરેક પડાવે પડછાયાની જેમ સાથે રહ્યાં હતાં.
તાજેતરના વર્ષોમાં પણ પ્યારેલાલ શર્મા જ્યારે કોઈ સંગીત સમારોહ, જાહેર કાર્યક્રમ અથવા ટેલિવિઝન શોમાં હાજરી આપતા, ત્યારે સુનીલાજી તેમની સાથે જોવા મળતા હતાં. પરિવારના જણાવ્યા મુજબ, તેમના અંતિમ સંસ્કાર આજે મુંબઈના સાંતાક્રુઝ (વેસ્ટ) સ્થિત દત્તાત્રેય રોડ સ્મશાનભૂમિ ખાતે કરવામાં આવશે.
સુનીલા શર્માના નિધનથી સંગીત જગતે એક સાદગીભર્યું અને પ્રેરણાદાયી વ્યક્તિત્વ ગુમાવ્યું છે.
