29 પરિવારજનોના DNA સેમ્પલ લેવાયા; મૃતદેહો અને માનવ અવશેષોની ઓળખ માટે પ્રોફાઇલિંગ શરૂ
ગાંધીનગરઃ નેપાળમાં આવેલા ભયાનક પૂર બાદ ગુમ થયેલા ગુજરાતીઓની ઓળખ માટે ગુજરાત સરકાર દ્વારા હાથ ધરાયેલી DNA સેમ્પલિંગની કામગીરી અંતિમ તબક્કામાં પહોંચી છે. પ્રાપ્ત માહિતી અનુસાર, નેપાળમાં પૂર બાદ ગુજરાતના 30 લોકો હજુ સુધી સંપર્કવિહોણા છે. આ પૈકી 29 લોકોના પરિવારજનોના DNA સેમ્પલ લેવામાં આવ્યા છે, જ્યારે એક પરિવારના સેમ્પલ લેવાની પ્રક્રિયા હજુ ચાલુ છે.
ગુમ થયેલા લોકોની ઓળખ માટે પરિવારજનો પાસેથી મેળવવામાં આવેલા DNA સેમ્પલનું પ્રોફાઇલિંગ કરવામાં આવી રહ્યું છે. નેપાળમાં પૂર બાદ મળી આવેલા મૃતદેહો તથા માનવ અવશેષોના DNA સાથે આ પ્રોફાઇલની સરખામણી કરીને ઓળખ કરવાની પ્રક્રિયા હાથ ધરાશે.
મુખ્યમંત્રી ભૂપેન્દ્ર પટેલના માર્ગદર્શન હેઠળ ગુજરાત સરકાર ગુમ થયેલા ગુજરાતીઓ તેમજ વિદેશમાં રહેતા ગુજરાતીઓના પરિવારજનોને જરૂરી સહાય અને માર્ગદર્શન આપી રહી છે. સામાન્ય વહીવટ વિભાગના NRI ડિવિઝન હેઠળ કાર્યરત ગુજરાત સ્ટેટ નોન-રેસિડન્ટ ગુજરાતીઝ ફાઉન્ડેશન (NRGF) દ્વારા સમગ્ર પ્રક્રિયાનું સંકલન કરવામાં આવી રહ્યું છે.
ભારત સરકારની માર્ગદર્શિકા મુજબ ગુમ થયેલા વ્યક્તિના નજીકના પ્રથમ-સ્તરના પરિવારજનોના DNA સેમ્પલ લેવામાં આવે છે. દેશભરમાં આ કામગીરી માટે નિયુક્ત ફોરેન્સિક લેબોરેટરીઓમાં DNA પ્રોફાઇલિંગની સુવિધા ઉપલબ્ધ કરાવવામાં આવી છે. કેન્દ્રીય ગૃહમંત્રી અમિત શાહના નિર્દેશ અનુસાર નિયુક્ત લેબોરેટરીઓ આ સેવા નિઃશુલ્ક આપી રહી છે.
ગુજરાતમાં ગાંધીનગર, અમદાવાદ, સુરત, વડોદરા, જૂનાગઢ અને રાજકોટ ખાતે આવેલી છ નિયુક્ત લેબોરેટરીઓમાં DNA પ્રોફાઇલિંગ કરવામાં આવી રહ્યું છે. NFSU ગાંધીનગર વિદેશ મંત્રાલય સાથે સંકલન કરીને ભારતમાં લેવાયેલા સેમ્પલના પ્રોફાઇલિંગ અને નેપાળમાં ચાલી રહેલી ઓળખ પ્રક્રિયા વચ્ચે જરૂરી સમન્વય કરી રહ્યું છે.
વિદેશમાં રહેતા ગુમ થયેલા ગુજરાતીઓના પરિવારજનોના DNA સેમ્પલ સંબંધિત દેશોના સ્થાનિક સત્તાવાળાઓના સહયોગથી લેવામાં આવ્યા છે. અમેરિકા, કેનેડા, ન્યૂઝીલેન્ડ તથા આફ્રિકન દેશોમાં રહેતા પરિવારજનોના કેસમાં NRGF સ્થાનિક સત્તાવાળાઓ પાસેથી સેમ્પલ અને ઓળખ પ્રક્રિયા અંગેની માહિતી મેળવી રહ્યું છે.
DNA પ્રોફાઇલિંગના અહેવાલો સંબંધિત લેબોરેટરીઓ દ્વારા નેપાળ સરકારના સત્તાવાર સંપર્ક માધ્યમો મારફતે સીધા મોકલવામાં આવી રહ્યા છે. ગુજરાત સરકાર ભારત સરકાર અને નેપાળમાં કાર્યરત કોન્સ્યુલર સત્તાવાળાઓ સાથે સંકલનમાં રહીને ગુમ થયેલા લોકો અંગેની માહિતી મેળવવા તથા ઓળખ પ્રક્રિયાને આગળ વધારવા કામગીરી કરી રહી છે.
