ભારતીય અર્થતંત્રની મજબૂત ગતિને જોતા ચાલુ નાણાકીય વર્ષમાં દેશનો આર્થિક વિકાસ દર 7%ની આસપાસ રહી શકે છે. RBIના ડેપ્યુટી ગવર્નર પૂનમ ગુપ્તાએ જણાવ્યું કે આ વૃદ્ધિ દર RBIના અગાઉના 6.7%ના અંદાજ કરતાં વધુ રહી શકે છે.
મદ્રાસ સ્કૂલ ઓફ ઈકોનોમિક્સના એક કાર્યક્રમમાં પૂનમ ગુપ્તાએ જણાવ્યું કે એપ્રિલ-જૂન ત્રિમાસિક ગાળામાં અર્થતંત્રના મજબૂત પ્રદર્શનની અપેક્ષા છે. પ્રથમ ત્રિમાસિક ગાળાના સત્તાવાર આંકડા જાહેર થયા બાદ સમગ્ર વર્ષના વિકાસ દરનું વધુ સ્પષ્ટ ચિત્ર સામે આવશે.
અર્થશાસ્ત્રીઓએ પ્રથમ ત્રિમાસિક ગાળામાં 6.9%થી 8% સુધીની આર્થિક વૃદ્ધિનું અનુમાન વ્યક્ત કર્યું છે. જો આ આંકડા અનુરૂપ પરિણામ આવે તો ભારત વિશ્વના સૌથી ઝડપથી વિકસતા મોટા અર્થતંત્રોમાં પોતાનું સ્થાન વધુ મજબૂત બનાવી શકે છે.
ચોમાસામાં વિલંબ અને ઊર્જાના ઊંચા ભાવ જેવા પડકારો છતાં દેશની આર્થિક પ્રવૃત્તિમાં મજબૂતાઈ જોવા મળી રહી છે. વપરાશ અને અન્ય આર્થિક પ્રવૃત્તિઓમાં સુધારાને કારણે વૃદ્ધિ દરને ટેકો મળવાની અપેક્ષા છે.
પૂનમ ગુપ્તાએ ભારતના બાહ્ય નાણાકીય ક્ષેત્ર અંગે પણ આશાવાદ વ્યક્ત કર્યો છે. આગામી સમયમાં વિદેશી મૂડીરોકાણમાં વધારો થવાની સંભાવના વચ્ચે ભારતીય અર્થતંત્રની ગતિ યથાવત રહેવાની આશા વ્યક્ત કરવામાં આવી છે.
