ઇસ્લામાબાદ: પાકિસ્તાન સરકારે પૂર્વ વડાપ્રધાન ઇમરાન ખાનને જેલમાંથી હોસ્પિટલમાં ખસેડવાના સુપ્રીમ કોર્ટના આદેશ સામે દાખલ કરેલી રિવ્યુ અરજી પાછી ખેંચી લીધી છે. સુપ્રીમ કોર્ટની રજિસ્ટ્રાર ઓફિસે અરજીમાં પ્રક્રિયાત્મક ખામીઓ દર્શાવ્યા બાદ સરકારને આ પગલું ભરવું પડ્યું હોવાનું અહેવાલોમાં જણાવાયું છે.
અરજીમાં ટેકનિકલ ખામીઓ
રિપોર્ટ મુજબ, સરકારની અરજી સાથે જરૂરી પેપર બુક અધૂરી હોવા સહિત કેટલીક ખામીઓ હતી. રજિસ્ટ્રારની વાંધાઓ દૂર કર્યા બાદ સરકાર ફરીથી નવી અરજી દાખલ કરી શકે છે.
સુપ્રીમ કોર્ટે હોસ્પિટલ ખસેડવાનો આપ્યો હતો આદેશ
18 ઓગસ્ટે પાકિસ્તાનની સુપ્રીમ કોર્ટે 73 વર્ષીય ઇમરાન ખાનને રાવલપિંડીની અદિયાલા જેલમાંથી શિફા ઇન્ટરનેશનલ હોસ્પિટલ, ઇસ્લામાબાદમાં તબીબી તપાસ અને સારવાર માટે ખસેડવાનો આદેશ આપ્યો હતો. મેડિકલ બોર્ડમાં તેમના અંગત તબીબ અને બહેનને પણ સામેલ કરવાનો નિર્દેશ અપાયો હતો.
સરકારને ખાનગી હોસ્પિટલ સામે વાંધો
સરકારનો મુખ્ય વાંધો એ હતો કે કેદીને ખાનગી હોસ્પિટલમાં ખસેડવા માટે જેલના નિયમો અને નિર્ધારિત પ્રક્રિયાનું પાલન જરૂરી છે. સરકારનું કહેવું હતું કે આ પ્રકારની છૂટ અન્ય કેદીઓ દ્વારા પણ માંગવામાં આવી શકે છે.
ઇમરાન ખાન ઓગસ્ટ 2023થી જેલમાં છે અને તેમના પક્ષ દ્વારા તેમની સામેના કેસોને રાજકીય રીતે પ્રેરિત ગણાવવામાં આવે છે. હવે સરકાર ખામીઓ સુધારીને ફરી રિવ્યુ અરજી કરે છે કે સુપ્રીમ કોર્ટના આદેશનો અમલ કરે છે, તેના પર નજર રહેશે.
