નિતેશ તિવારીના ડ્રીમ પ્રોજેક્ટનું ટીઝર રિલીઝ; એ.આર. રહેમાન અને હેન્સ ઝિમર પ્રથમ વખત સાથે
મુંબઈ: નિર્માતા નમિત મલ્હોત્રા અને દિગ્દર્શક નિતેશ તિવારીની બહુપ્રતીક્ષિત ફિલ્મ **’રામાયણ’**નું ટીઝર રિલીઝ થતાં જ દેશભરના સિનેમાપ્રેમીઓમાં ભારે ઉત્સાહ જોવા મળી રહ્યો છે. અંદાજે રૂ.4,000 કરોડના બજેટ સાથે બની રહેલી આ ફિલ્મ ભારતીય સિનેમાના ઇતિહાસની સૌથી ભવ્ય અને મોંઘી ફિલ્મોમાં સામેલ થશે.
બે ભાગમાં રજૂ થનારી આ ફિલ્મનો પ્રથમ ભાગ દિવાળી-2026માં અને બીજો ભાગ દિવાળી-2027માં રિલીઝ થશે. ફિલ્મનું નિર્માણ Prime Focus Studios અને Monster Mind Creations દ્વારા કરવામાં આવી રહ્યું છે, જ્યારે વિશ્વવિખ્યાત DNEG તેની વિઝ્યુઅલ ઇફેક્ટ્સની જવાબદારી સંભાળી રહી છે.
ફિલ્મમાં રણબીર કપૂર ભગવાન શ્રીરામ, યશ રાવણ, સાઈ પલ્લવી માતા સીતા, સની દેઓલ ભગવાન હનુમાન અને રવિ દુબે લક્ષ્મણની ભૂમિકામાં જોવા મળશે. ઉપરાંત વિવેક ઓબેરોય વિદ્યુતજિહ્વાનું પાત્ર ભજવશે.
ફિલ્મનું સંગીત પણ ખાસ આકર્ષણ બનવાનું છે. ઓસ્કર વિજેતા એ.આર. રહેમાન અને હોલિવૂડના લેજેન્ડરી સંગીતકાર હેન્સ ઝિમર પ્રથમ વખત એકસાથે આ મેગા પ્રોજેક્ટ માટે સંગીત તૈયાર કરી રહ્યા છે.
ફિલ્મના પ્રથમ ભાગનું શૂટિંગ પૂર્ણ થઈ ચૂક્યું છે અને હાલ પોસ્ટ-પ્રોડક્શન તથા VFXનું કામ અંતિમ તબક્કામાં ચાલી રહ્યું છે.
