બંગાળની ખાડીમાં સક્રિય લો-પ્રેશરની અસરથી ચોમાસું ફરી બનશે સક્રિય; દક્ષિણ ગુજરાતમાં અતિ ભારે વરસાદનું એલર્ટ
અમદાવાદ: છેલ્લા કેટલાક દિવસોથી રાજ્યમાં છૂટાછવાયા ઝાપટા અને હળવાથી મધ્યમ વરસાદ વચ્ચે હવે ચોમાસું ફરી જોર પકડવાના સંકેતો મળી રહ્યા છે. ભારતીય હવામાન વિભાગે આગામી 26થી 28 જુલાઈ દરમિયાન સૌરાષ્ટ્ર, કચ્છ અને ગુજરાતના મોટાભાગના વિસ્તારોમાં સારો વરસાદ થવાની આગાહી કરી છે. અનેક જિલ્લાઓમાં 2થી 7 ઈંચ સુધી વરસાદ નોંધાઈ શકે છે, જ્યારે કેટલાક વિસ્તારોમાં તેનાથી પણ વધુ વરસાદ પડવાની શક્યતા વ્યક્ત કરવામાં આવી છે.
હવામાન વિભાગના જણાવ્યા મુજબ બંગાળની ખાડીમાં સક્રિય બનેલી લો-પ્રેશર સિસ્ટમ આગામી દિવસોમાં વધુ મજબૂત બનશે, જેના કારણે સમગ્ર ગુજરાતમાં વરસાદી પ્રવૃત્તિમાં નોંધપાત્ર વધારો થવાની સંભાવના છે. ખાસ કરીને દક્ષિણ ગુજરાત અને સૌરાષ્ટ્રના કેટલાક જિલ્લાઓમાં ભારેથી અતિ ભારે વરસાદ નોંધાઈ શકે છે.
હાલના સપ્તાહ દરમિયાન રાજ્યના વિવિધ વિસ્તારોમાં હળવાથી મધ્યમ વરસાદનો માહોલ યથાવત રહેવાની શક્યતા છે, પરંતુ સપ્તાહના અંતથી વરસાદનું જોર વધશે અને ખેડૂતો સહિત સામાન્ય નાગરિકોને રાહત મળે તેવી આશા વ્યક્ત કરવામાં આવી રહી છે.
દરમિયાન રાજકોટ સહિત રાજ્યના અનેક વિસ્તારોમાં આજે પણ વાદળછાયું વાતાવરણ વચ્ચે ક્યાંક ક્યાંક હળવા વરસાદી ઝાપટાં નોંધાયા હતા. રાજકોટમાં સવારે 8:30 વાગ્યે મહત્તમ તાપમાન 27.6 ડિગ્રી સેલ્સિયસ, જ્યારે લઘુત્તમ તાપમાન 23.7 ડિગ્રી સેલ્સિયસ નોંધાયું હતું. શહેરમાં હવામાં 87 ટકા ભેજ અને 8 કિલોમીટર પ્રતિ કલાકની સરેરાશ પવનની ગતિ નોંધાઈ હતી.
હવામાન વિભાગે આગામી દિવસોમાં ભારે વરસાદની શક્યતાને ધ્યાનમાં રાખીને નીચાણવાળા વિસ્તારોમાં રહેતા લોકોને સાવચેત રહેવા તેમજ સ્થાનિક વહીવટીતંત્ર દ્વારા જાહેર કરવામાં આવતી સૂચનાઓનું પાલન કરવાની અપીલ કરી છે.
