રાજોરીના તારકુંડી વિસ્તારમાં દોઢ કલાક સુધી અથડામણ; LoC પર સુરક્ષા વધુ કડક
શ્રીનગર: લાંબા સમય બાદ જમ્મુ-કાશ્મીરની નિયંત્રણ રેખા (LoC) પર ફરી એકવાર ઘુસણખોરીનો પ્રયાસ સામે આવ્યો છે. રાજોરી જિલ્લાના તારકુંડી સેક્ટરમાં શંકાસ્પદ હિલચાલ જોવા મળતાં બોર્ડર સુરક્ષા દળ (BSF)એ તાત્કાલિક કાર્યવાહી કરીને ઘુસણખોરીનો પ્રયાસ નિષ્ફળ બનાવ્યો હતો.
સુરક્ષા સૂત્રોના જણાવ્યા મુજબ, સરહદ નજીક કેટલાક શંકાસ્પદ લોકો ભારતીય વિસ્તારમાં પ્રવેશવાનો પ્રયાસ કરી રહ્યા હોવાનું જવાનોને જણાયું હતું. પ્રથમ તેમને આત્મસમર્પણ કરવા અને આગળ ન વધવાની ચેતવણી આપવામાં આવી હતી, પરંતુ તેમણે ચેતવણીની અવગણના કરતાં રાત્રે આશરે 10 વાગ્યે BSFએ ગોળીબાર શરૂ કર્યો હતો.
ત્યારબાદ બંને તરફથી લગભગ દોઢ કલાક સુધી ભારે ગોળીબાર ચાલ્યો હતો. ભારતીય જવાનોના અસરકારક જવાબી પગલાં બાદ શંકાસ્પદ ઘુસણખોરો પાકિસ્તાન અધિકૃત કાશ્મીર (PoK) તરફ પાછા હટી ગયા હોવાનું પ્રાથમિક તપાસમાં સામે આવ્યું છે.
ઘટના બાદ સમગ્ર વિસ્તારમાં સર્ચ ઓપરેશન હાથ ધરવામાં આવ્યું છે અને નિયંત્રણ રેખા પર વધારાના સુરક્ષા દળો તૈનાત કરવામાં આવ્યા છે. કોઈ ઘુસણખોર ભારતીય વિસ્તારમાં પ્રવેશવામાં સફળ થયો હતો કે નહીં તે અંગે પણ સઘન તપાસ ચાલી રહી છે.
સુરક્ષા એજન્સીઓનું માનવું છે કે આતંકી સંગઠનો રાત્રિના અંધકાર અને પહાડી વિસ્તારનો લાભ લઈને ઘુસણખોરીના પ્રયાસો કરતા રહે છે. જોકે સરહદ પરની મજબૂત સુરક્ષા વ્યવસ્થાને કારણે આવા પ્રયાસો મોટાભાગે નિષ્ફળ સાબિત થઈ રહ્યા છે.
