95 તાલુકામાં વરસાદની નોંધ, પરંતુ ચોમાસાની ખાધ યથાવત્; ચાર તાલુકા હજુ પણ કોરાધાકોર
અમદાવાદ: ગુજરાતમાં ચોમાસું ફરી સક્રિય થવાના સંકેતો વચ્ચે દક્ષિણ ગુજરાતમાં મેઘરાજાએ જોરદાર હાજરી નોંધાવી છે. રાજ્યના 25 જિલ્લાનાં 95 તાલુકામાં હળવાથી મધ્યમ વરસાદ વરસ્યો છે, જેમાં વલસાડના કપરાડામાં સૌથી વધુ 94 મીમી (લગભગ 4 ઇંચ) વરસાદ નોંધાયો છે. જોકે રાજ્યના મોટા ભાગના વિસ્તારોમાં હજુ વરસાદની ભારે ખાધ યથાવત્ હોવાથી ખેડૂતોની ચિંતા યથાવત્ છે.
સ્ટેટ ઇમરજન્સી ઓપરેશન સેન્ટરના અહેવાલ મુજબ નવસારીના ખેરગામમાં 55 મીમી, સુરતના કામરેજમાં 54 મીમી, નાનપોંઢામાં 37 મીમી, પાલસાણામાં 36 મીમી, ધરમપુરમાં 27 મીમી અને બારડોલીમાં 25 મીમી વરસાદ નોંધાયો હતો. ભરૂચ, નર્મદા, તાપી અને ડાંગ જિલ્લાના અનેક વિસ્તારોમાં પણ સારો વરસાદ વરસ્યો હતો.
મધ્ય ગુજરાતમાં પેટલાદ, સોજીત્રા અને ઘોઘંબા સહિતના વિસ્તારોમાં આશરે બે ઇંચ વરસાદ નોંધાયો હતો, જ્યારે સૌરાષ્ટ્ર અને કચ્છના મોટા ભાગના વિસ્તારોમાં માત્ર ઝરમર વરસાદ પડ્યો હતો. ઉત્તર ગુજરાતમાં તો વરસાદે સંપૂર્ણ વિરામ લીધો હતો.
રાજ્યમાં અત્યાર સુધી સરેરાશ 908.88 મીમી સામે માત્ર 236.44 મીમી વરસાદ નોંધાયો છે, જે મોસમના કુલ સરેરાશ વરસાદના માત્ર 26.02 ટકા જેટલો છે. ઝોન મુજબ દક્ષિણ ગુજરાતમાં 36.71 ટકા, સૌરાષ્ટ્રમાં 28.89 ટકા, મધ્ય ગુજરાતમાં 18.68 ટકા, ઉત્તર ગુજરાતમાં 14.42 ટકા અને કચ્છમાં માત્ર 3.42 ટકા વરસાદ નોંધાયો છે.
ચોમાસાની અડધી સિઝન પૂર્ણ થવા આવી હોવા છતાં રાજ્યના ચાર તાલુકામાં હજુ સુધી વરસાદનો એક ટીપો પણ પડ્યો નથી, જ્યારે 111 તાલુકામાં પાંચ ઇંચથી પણ ઓછો વરસાદ નોંધાયો છે. માત્ર પાંચ તાલુકામાં જ 40 ઇંચથી વધુ વરસાદ નોંધાયો છે, જે વરસાદના અસમાન વિતરણની સ્પષ્ટ સ્થિતિ દર્શાવે છે.
વરસાદની લાંબી ખાધને કારણે કૃષિ ક્ષેત્ર પર ગંભીર અસર જોવા મળી રહી છે. ઉત્તર ગુજરાત અને સૌરાષ્ટ્રના અનેક વિસ્તારોમાં હજુ વાવણી પૂર્ણ થઈ નથી, જ્યારે વાવણી થયેલા પાકને પણ તાત્કાલિક વરસાદની જરૂરિયાત છે. હવામાન નિષ્ણાતોના મતે અલ નીનોની અસરને કારણે ચોમાસું હજુ અસ્થિર રહેતાં આગામી દિવસોમાં વરસાદની સ્થિતિ અત્યંત મહત્વપૂર્ણ રહેશે.
