રાજકોટ: શહેરના વોર્ડ નં. 9માં આવેલા ગંગોત્રી પાર્ક વિસ્તારમાં મુખ્ય માર્ગ પર ટાઉન પ્લાનિંગના નિયમોનો ખુલ્લેઆમ ભંગ કરીને ગેરકાયદે કોમર્શિયલ બાંધકામ થતું હોવાના આક્ષેપો સામે આવ્યા છે. સ્થાનિકોના જણાવ્યા મુજબ જરૂરી માર્જિન છોડ્યા વિના બાંધકામ ઝડપથી આગળ વધી રહ્યું છે.
વિસ્તારના રહેવાસીઓનો આરોપ છે કે અનેક વખત સંબંધિત વિભાગમાં લેખિત અને મૌખિક રજૂઆતો કરવા છતાં બાંધકામ અટકાવવામાં આવ્યું નથી. જેના કારણે સ્થાનિકોમાં તંત્રની કામગીરી સામે અસંતોષ જોવા મળી રહ્યો છે.
સ્થાનિકોનું કહેવું છે કે નિયમોના સ્પષ્ટ ભંગ છતાં કાર્યવાહી ન થવાને કારણે વિભાગની ભૂમિકા અંગે અનેક સવાલો ઉભા થયા છે. કેટલાક લોકોએ રાજકીય અથવા વિભાગીય સ્તરે ગોઠવણ હોવાની પણ શંકા વ્યક્ત કરી છે, જોકે આ દાવાઓ અંગે કોઈ સત્તાવાર પુષ્ટિ થઈ નથી.
સ્થાનિકોએ ટાઉન પ્લાનિંગ વિભાગ અને મહાનગરપાલિકા પાસે સમગ્ર મામલે તાત્કાલિક તપાસ કરીને નિયમ વિરુદ્ધના બાંધકામ સામે કડક કાર્યવાહી કરવાની માંગ કરી છે. હવે તંત્ર આ ફરિયાદોને લઈને શું પગલાં ભરે છે તેના પર સૌની નજર મંડાઈ છે.
