કચ્છ: જિલ્લામાં સરકારી જમીન પરના ગેરકાયદેસર દબાણો સામે વહીવટી તંત્રે કડક કાર્યવાહી હાથ ધરી છે. જૂના કંડલા વિસ્તારમાં એક જ અઠવાડિયામાં અંદાજે 15 જેટલા ગેરકાયદેસર દબાણો દૂર કરીને લાખો રૂપિયાની સરકારી જમીન દબાણમુક્ત કરવામાં આવી છે.
મેગા ડિમોલિશન દરમિયાન ચુસ્ત પોલીસ બંદોબસ્ત ગોઠવવામાં આવ્યો હતો. કોઈ અનિચ્છનીય ઘટના ન બને તે માટે મોટી સંખ્યામાં પોલીસ દળ તૈનાત રાખવામાં આવ્યું હતું અને સમગ્ર કાર્યવાહી શાંતિપૂર્ણ માહોલમાં પૂર્ણ કરવામાં આવી હતી.
વહીવટી તંત્ર દ્વારા સરકારી જમીન પર થયેલા વિવિધ પ્રકારના ગેરકાયદેસર દબાણો દૂર કરવામાં આવ્યા હતા. કાર્યવાહીમાં ધાર્મિક સ્વરૂપના ગેરકાયદેસર બાંધકામો સહિત અન્ય દબાણો પણ હટાવવામાં આવ્યા હોવાનું અધિકારીઓએ જણાવ્યું છે.
અધિકારીઓના જણાવ્યા મુજબ, સરકારી જમીન પરના ગેરકાયદેસર કબજાઓ સામે ઝુંબેશ આગામી દિવસોમાં પણ યથાવત રહેશે. જાહેર મિલકતોને દબાણમુક્ત બનાવવા અને સરકારી જમીનનું રક્ષણ કરવા માટે આવા અભિયાનને વધુ વેગ આપવામાં આવશે.
વહીવટી તંત્રે લોકોને સરકારી જમીન પર કોઈપણ પ્રકારનું ગેરકાયદેસર દબાણ ન કરવા અપીલ કરી છે અને નિયમોનું ઉલ્લંઘન કરનારાઓ સામે કાયદેસરની કાર્યવાહી ચાલુ રહેશે તેવી ચેતવણી પણ આપી છે.
