જયપુર: રાજસ્થાનના જયપુર જિલ્લાના ચંદવાજી વિસ્તારમાં નિર્માણાધીન ઈમારતની દિવાલ અચાનક ધરાશાયી થતાં મોટી દુર્ઘટના સર્જાઈ છે. આ અકસ્માતમાં કાટમાળ નીચે દબાઈ જતાં 6 મજૂરોના મોત થયા છે, જ્યારે અનેક શ્રમિકો ઘાયલ થયા હોવાનું સામે આવ્યું છે. હજુ પણ કેટલાક લોકો કાટમાળ નીચે ફસાયેલા હોવાની આશંકા વ્યક્ત કરવામાં આવી રહી છે.
માહિતી મુજબ, ચંદવાજી સ્થિત અરાવલી પેલેસમાં નિર્માણ કાર્ય ચાલી રહ્યું હતું. તે દરમિયાન અચાનક નિર્માણાધીન દિવાલ તૂટી પડતાં નજીકમાં કામ કરી રહેલા મજૂરો તેની નીચે દબાઈ ગયા હતા. ઘટનાની જાણ થતાં જ સ્થાનિક પ્રશાસન, પોલીસ, ફાયર બ્રિગેડ અને બચાવ ટીમો તાત્કાલિક સ્થળ પર પહોંચી ગઈ હતી અને યુદ્ધના ધોરણે રેસ્ક્યૂ ઓપરેશન શરૂ કરવામાં આવ્યું હતું.
પ્રાથમિક માહિતી અનુસાર, દુર્ઘટનામાં મૃત્યુ પામેલા અને ઘાયલ થયેલા મોટાભાગના મજૂરો ઝારખંડ અને બિહારના રહેવાસી હોવાનું જાણવા મળ્યું છે. ઘટનાના સમયે સ્થળ પર મર્યાદિત સંખ્યામાં મજૂરો હાજર હોવાથી વધુ મોટી જાનહાનિ ટળી હોવાનું પણ જણાવાઈ રહ્યું છે.
ઘાયલ મજૂરોને તાત્કાલિક નજીકની હોસ્પિટલમાં સારવાર માટે ખસેડવામાં આવ્યા છે. પ્રશાસને સમગ્ર ઘટનાની તપાસ શરૂ કરી છે અને દિવાલ ધરાશાયી થવાનું ચોક્કસ કારણ જાણવા માટે તકનિકી તપાસ હાથ ધરવામાં આવી રહી છે. બચાવ કામગીરી પૂર્ણ થયા બાદ જાનહાનિનો આંકડો વધવાની શક્યતાને પણ નકારી શકાય તેમ નથી.
