વડોદરા: વડોદરા જિલ્લાના દશરથ ગામમાં 42 વર્ષીય યુવકની નિર્મમ હત્યાની ઘટનાએ સમગ્ર વિસ્તારમાં ભારે સનસનાટી ફેલાવી છે. ખુલ્લા ખેતરમાં ધાબળો ઢાંકેલી હાલતમાં યુવકનો મૃતદેહ મળી આવતાં સ્થાનિકોમાં ભય અને ચકચારનો માહોલ સર્જાયો હતો.
પ્રાથમિક માહિતી મુજબ, યુવક ઘરે પરત ન ફરતા પરિવારજનોએ તેની શોધખોળ શરૂ કરી હતી. દરમિયાન ગામની સીમમાં આવેલા એક ખેતરમાં ધાબળો ઢાંકેલી હાલતમાં મૃતદેહ મળી આવતાં સમગ્ર ઘટનાનો ખુલાસો થયો હતો. ઘટનાની જાણ થતાં જ સ્થાનિક પોલીસનો કાફલો તાત્કાલિક સ્થળ પર પહોંચ્યો હતો અને સ્થળનું પંચનામું કરીને મૃતદેહને પોસ્ટમોર્ટમ માટે મોકલી આપવામાં આવ્યો હતો.
પોલીસે પ્રાથમિક તપાસમાં હત્યાની આશંકા વ્યક્ત કરી અજાણ્યા શખ્સો સામે ગુનો નોંધી તપાસનો ધમધમાટ શરૂ કર્યો છે. ફોરેન્સિક ટીમ દ્વારા ઘટનાસ્થળેથી પુરાવા એકત્ર કરવામાં આવ્યા છે, જ્યારે આસપાસના વિસ્તારોના CCTV ફૂટેજ તેમજ અન્ય ટેક્નિકલ પુરાવાના આધારે હત્યારાઓ સુધી પહોંચવાના પ્રયાસો હાથ ધરવામાં આવ્યા છે.
હત્યા પાછળનું ચોક્કસ કારણ હજુ સુધી સામે આવ્યું નથી. પોલીસે મૃતકના પરિવારજનો અને ઓળખીતાઓના નિવેદનો નોંધવાની સાથે તમામ સંભવિત દિશામાં તપાસ શરૂ કરી છે. સમગ્ર ઘટનાને લઈને દશરથ ગામ અને આસપાસના વિસ્તારમાં ભારે ચકચારનો માહોલ જોવા મળી રહ્યો છે.
