Vadodara ના ગોત્રી વિસ્તારમાં જાહેર માર્ગ પર મેડિકલ કચરો મળી આવતાં સ્થાનિક લોકોમાં ભારે રોષ ફેલાયો છે.
માહિતી મુજબ, કલ્પવૃક્ષ કોમ્પ્લેક્સ સામેની ગલીમાં રોડના કિનારે દવાઓ, ઇન્જેક્શન અને અન્ય મેડિકલ વેસ્ટ ફેંકી દેવાયેલ હાલતમાં જોવા મળ્યો હતો. આ ઘટનાને કારણે વિસ્તારમાં રોગચાળો ફેલાવાની ભીતિ વ્યક્ત કરવામાં આવી રહી છે.
પ્રાથમિક તપાસ દરમિયાન કેટલીક દવાઓ અને સામગ્રી પર એક્સપાયરી તારીખ દર્શાવવામાં આવી ન હોવાનું પણ સામે આવ્યું છે, જેના કારણે મામલો વધુ ગંભીર બન્યો છે.
હાલ તંત્ર દ્વારા તપાસ શરૂ કરવામાં આવી છે કે આ મેડિકલ વેસ્ટ કોઈ હોસ્પિટલ, ક્લિનિક અથવા મેડિકલ સ્ટોર દ્વારા ગેરકાયદેસર રીતે ઠાલવવામાં આવ્યો છે કે કેમ. પુરાવા છુપાવવાના હેતુથી કચરો ફેંકવામાં આવ્યો હોવાની શક્યતા પણ તપાસ હેઠળ છે.
સ્થાનિક રહેવાસીઓએ જવાબદાર લોકો સામે કડક કાર્યવાહી કરવાની માંગ કરી છે. હવે Vadodara Municipal Corporation અને આરોગ્ય વિભાગ દ્વારા શું પગલાં લેવામાં આવે છે તેના પર સૌની નજર છે.
મેડિકલ વેસ્ટનો યોગ્ય નિકાલ ન થવાથી જાહેર આરોગ્ય અને પર્યાવરણ બંને માટે જોખમ ઊભું થઈ શકે છે, તેથી તંત્ર દ્વારા ઝડપી કાર્યવાહી જરૂરી માનવામાં આવી રહી છે.
