અમરેલી જિલ્લાના બાબરા શહેરમાં ભ્રષ્ટાચાર વિરોધી બ્યુરો (ACB)એ સફળ ટ્રેપ ગોઠવી નગરપાલિકાના જન્મ-મરણ શાખાના જુનિયર ક્લાર્કને લાંચ લેતા રંગેહાથ ઝડપી પાડ્યો છે. આ કાર્યવાહી બાદ નગરપાલિકા વર્તુળમાં ભારે ચકચાર મચી ગઈ છે.
મળતી માહિતી મુજબ, જન્મ-મરણનો દાખલો કાઢી આપવા માટે જુનિયર ક્લાર્ક નનુ ગમારાએ અરજદાર પાસેથી રૂપિયા 5 હજારની લાંચની માંગણી કરી હતી. ફરિયાદી દ્વારા આ અંગે અમરેલી ACBનો સંપર્ક કરવામાં આવતા અધિકારીઓએ ટ્રેપ ગોઠવવાની યોજના બનાવી હતી.
નક્કી કરાયેલા સ્થળે આરોપી નનુ ગમારા ફરિયાદી પાસેથી રૂપિયા 5 હજારની લાંચ સ્વીકારી રહ્યો હતો ત્યારે ACBની ટીમે તેને રંગેહાથ ઝડપી પાડ્યો હતો. કાર્યવાહી દરમિયાન લાંચની રકમ પણ કબજે કરવામાં આવી હતી.
ACBની ટીમે આરોપીની ધરપકડ કરી તેની સામે ભ્રષ્ટાચાર નિવારણ અધિનિયમ હેઠળ ગુનો નોંધી વધુ તપાસ હાથ ધરી છે. આરોપીએ અગાઉ પણ આવી કોઈ ગેરરીતિ આચરી છે કે નહીં તે દિશામાં પણ તપાસ કરવામાં આવી રહી છે.
આ ટ્રેપ કાર્યવાહી બાદ સરકારી કચેરીઓમાં લાંચખોરી સામે ACBની કડક કાર્યવાહીનો વધુ એક દાખલો સામે આવ્યો છે.
