વિશ્વભરમાં વધતી ગરમી અને આબોહવા પરિવર્તનની અસર વચ્ચે ભારતના અનેક શહેરો ગંભીર હીટ સ્ટ્રેસનો સામનો કરી રહ્યા છે. ઓક્સફર્ડ યુનિવર્સિટી દ્વારા કરવામાં આવેલા વૈશ્વિક શહેરોના અભ્યાસ અનુસાર, વિશ્વના 50 સૌથી વધુ ગરમીથી પ્રભાવિત શહેરોમાં ભારતના 14 શહેરોનો સમાવેશ થયો છે.
આ યાદીમાં અમદાવાદ, નાગપુર, મદુરાઈ, ભોપાલ, કાનપુર, પુણે, પટના, હૈદરાબાદ, બેંગલુરુ, કોલકાતા, જયપુર, લખનૌ, મુંબઈ અને ચેન્નાઈ જેવા શહેરોનો સમાવેશ થાય છે. અભ્યાસ મુજબ, વૈશ્વિક રેન્કિંગમાં અમદાવાદ બીજા ક્રમે, નાગપુર ચોથા ક્રમે અને મદુરાઈ સાતમા ક્રમે સ્થાન ધરાવે છે.
રિપોર્ટમાં દર્શાવવામાં આવ્યું છે કે વધતું શહેરીકરણ, ઊંચું તાપમાન અને હવામાન પરિવર્તનની અસરને કારણે આ શહેરોમાં ગરમીનું જોખમ સતત વધી રહ્યું છે. નિષ્ણાતોના મતે, શહેરોમાં હરિયાળી વધારવી, ગરમી સામે રક્ષણાત્મક આયોજન કરવું અને ટકાઉ શહેરી વિકાસને પ્રોત્સાહન આપવું સમયની માંગ બની ગઈ છે.
આ અભ્યાસ વિશ્વભરના શહેરોને ગરમીના વધતા ખતરાથી સાવચેત રહેવા અને લાંબા ગાળાના ઉકેલો અમલમાં મૂકવા માટે મહત્વપૂર્ણ સંકેત આપે છે.
