અફઘાનિસ્તાન સામેની T20 શ્રેણીની બીજી મેચમાં આજે ટીમ ઈન્ડિયા મેદાનમાં ઉતરશે. પ્રથમ મેચમાં શાનદાર જીત બાદ ભારતની નજર હવે શ્રેણી પોતાના નામે કરવા પર છે. જોકે, ટીમ માટે પાંચમા બોલિંગ વિકલ્પની સમસ્યા મોટો પડકાર બની છે. વરુણ ચક્રવર્તી ઈજાના કારણે શ્રેણીમાંથી બહાર થતાં ભારતીય ટીમની મુશ્કેલી વધી છે.
પ્રથમ મેચમાં પાર્ટ-ટાઈમ બોલરો મોંઘા પડ્યા
પ્રથમ મેચમાં ભારતે મોટી જીત મેળવી હતી, પરંતુ નીતિશ કુમાર રેડ્ડી અને શિવમ દુબે અપેક્ષા મુજબ બોલિંગ કરી શક્યા નહોતા. બંનેએ મળીને ત્રણ ઓવરમાં 51 રન ખર્ચ્યા હતા, જ્યારે તેમની ઈકોનોમી 17 રહી હતી.
એક સમયે અફઘાનિસ્તાનની ટીમ મોટો સ્કોર કરી શકશે નહીં તેવું લાગી રહ્યું હતું, પરંતુ પાર્ટ-ટાઈમ બોલરોની મોંઘી બોલિંગના કારણે ટીમ 150 રનનો આંકડો પાર કરવામાં સફળ રહી હતી.
પાંચમા બોલિંગ વિકલ્પની શોધ
હાર્દિક પંડ્યાની ઈજાને કારણે ભારતીય ટીમ પહેલેથી જ પાંચમા વિશ્વસનીય બોલિંગ વિકલ્પની સમસ્યાનો સામનો કરી રહી છે. અર્શદીપ સિંહ, જસપ્રીત બુમરાહ, અક્ષર પટેલ અને વરુણ ચક્રવર્તીના પ્રદર્શનથી પ્રથમ મેચમાં સમસ્યા મોટી બની નહોતી, પરંતુ વરુણ બહાર થતાં ટીમના બોલિંગ કોમ્બિનેશન પર ફરી સવાલ ઊભો થયો છે.
કેપ્ટન શ્રેયસે હવે દુબે અને નીતિશમાંથી કોઈ એકને વધુ જવાબદારી આપવી પડશે અથવા અન્ય વિકલ્પ અજમાવવો પડશે.
અભિષેકે ફોર્મની ચિંતા દૂર કરી
બેટિંગમાં અભિષેક શર્માએ આક્રમક ઈનિંગ રમીને ફોર્મ અંગેની ચર્ચાઓ પર પૂર્ણવિરામ મૂક્યું છે. ઈશાને પણ પ્રેક્ટિસ દરમિયાન પીઠ પર લાગેલી સામાન્ય ઈજાને બાજુ પર રાખીને સારી બેટિંગ કરી હતી.
બીજી તરફ સંજુ સેમસન માટે આજની મેચ ખાસ મહત્વની છે. ટીમમાં સ્થાન જાળવી રાખવા માટે તેની પાસેથી મોટી ઈનિંગની અપેક્ષા રહેશે. યુવા વૈભવ સૂર્યવંશી ટીમમાં સ્થાન માટે દાવેદારી મજબૂત કરી રહ્યો હોવાથી સેમસન પર દબાણ વધ્યું છે.
વરુણ શ્રેણીમાંથી બહાર
સ્પિનર વરુણ ચક્રવર્તી સ્નાયુઓમાં ખેંચાણની નવી ઈજાના કારણે શ્રેણીની બાકીની મેચોમાં રમી શકશે નહીં. MRI રિપોર્ટ બાદ BCCIએ તેની ઈજાની પુષ્ટિ કરી છે. એશિયન ગેમ્સમાં પણ તેના રમવા અંગે અનિશ્ચિતતા છે.
તાજેતરના સમયમાં સેન્ટર ઓફ એક્સેલન્સ ખાતે ભારતીય ખેલાડીઓની ઈજાના કિસ્સા વારંવાર સામે આવતા હોવાથી ત્યાંની ઈજા વ્યવસ્થાપન વ્યવસ્થા પણ ચર્ચામાં આવી છે.
