બંગાળની ખાડીમાં સક્રિય ડીપ ડિપ્રેશનની અસર; દક્ષિણ, મધ્ય ગુજરાત અને સૌરાષ્ટ્રના અનેક જિલ્લામાં ભારે વરસાદની ચેતવણી
અમદાવાદ: ગુજરાતમાં ભારે વરસાદ બાદ થોડો વિરામ મળ્યા પછી હવે મેઘરાજા ફરી સક્રિય બનવાના છે. બંગાળની ખાડીમાં સર્જાયેલી ડીપ ડિપ્રેશન સિસ્ટમની અસરથી 30 જુલાઈથી 2 ઓગસ્ટ સુધી રાજ્યમાં વરસાદનો નવો રાઉન્ડ શરૂ થશે, જ્યારે 31 જુલાઈએ કેટલાક વિસ્તારોમાં અતિભારે વરસાદ પડવાની શક્યતા હવામાન વિભાગે વ્યક્ત કરી છે.
હવામાન વિભાગના જણાવ્યા અનુસાર હાલ ડીપ ડિપ્રેશન ઉત્તર ઓડિશા, ઝારખંડ અને છત્તીસગઢ તરફ આગળ વધી રહ્યું છે. તેની અસર આગામી દિવસોમાં ગુજરાત સહિત પશ્ચિમ ભારતના અનેક રાજ્યોમાં જોવા મળશે, જેના કારણે વરસાદી પ્રવૃત્તિમાં નોંધપાત્ર વધારો થવાની શક્યતા છે.
નર્મદા, છોટાઉદેપુર, વડોદરા, ભરૂચ, સુરત, તાપી, ડાંગ, નવસારી અને વલસાડ જિલ્લામાં 30 જુલાઈથી ભારે વરસાદની સંભાવના છે. જ્યારે 31 જુલાઈએ નર્મદા અને છોટાઉદેપુર જિલ્લામાં અતિભારે વરસાદ વરસી શકે છે. ઉપરાંત આણંદ, પંચમહાલ, દાહોદ, વડોદરા, ભરૂચ, સુરત, તાપી, ડાંગ, નવસારી અને વલસાડ જિલ્લામાં પણ ભારે વરસાદની આગાહી કરવામાં આવી છે.
બીજી તરફ સૌરાષ્ટ્ર-કચ્છમાં 31 જુલાઈથી 2 ઓગસ્ટ દરમિયાન વ્યાપક વરસાદી માહોલ રહેવાની શક્યતા છે. વરસાદના નવા રાઉન્ડને પગલે નીચાણવાળા વિસ્તારોમાં પાણી ભરાવા, નદી-નાળાઓમાં પાણીની આવક વધવા અને સ્થાનિક સ્તરે પૂર જેવી સ્થિતિ સર્જાવાની શક્યતા નકારી શકાય નહીં.
હવામાન વિભાગે લોકોને બિનજરૂરી મુસાફરી ટાળવા, નદી-નાળાથી દૂર રહેવા અને જિલ્લા વહીવટી તંત્ર દ્વારા જાહેર કરવામાં આવતી સૂચનાઓનું પાલન કરવાની અપીલ કરી છે.
