કચ્છ: પૂર્વ કચ્છ જિલ્લામાં આજે સવારથી જ ચોમાસાએ ફરી એકવાર દસ્તક આપી હતી. રાપર, ગાંધીધામ સહિત અનેક વિસ્તારોમાં છૂટાછવાયા વરસાદી ઝાપટાં વરસતાં વાતાવરણમાં ઠંડક પ્રસરી ગઈ હતી. લાંબા વિરામ બાદ પડેલા વરસાદે લોકોમાં રાહતનો અહેસાસ કરાવ્યો હતો.
રાપર તાલુકાના બાલાસર, રામવાવ સહિતના ગામોમાં મેઘરાજાએ મહેર વરસાવી હતી. વરસાદને કારણે ગ્રામ્ય વિસ્તારોમાં ચોમાસાની તાજગી ફરી જોવા મળી હતી, જ્યારે શહેરોમાં પણ ગરમી અને ઉકળાટમાં નોંધપાત્ર ઘટાડો નોંધાયો હતો.
કચ્છી નવા વર્ષના પવિત્ર દિવસે વરસેલા વરસાદને સ્થાનિક લોકોએ શુભ સંકેત તરીકે આવકાર્યો હતો. નવા વર્ષની શરૂઆત વરસાદ સાથે થતાં અનેક પરિવારો અને વેપારીઓમાં આનંદનું વાતાવરણ જોવા મળ્યું હતું.
ખેડૂતો માટે પણ આ વરસાદ આશીર્વાદ સમાન સાબિત થયો છે. ખેતરોમાં ભેજ વધતાં આગામી વાવેતર અને પાકના વિકાસ માટે અનુકૂળ પરિસ્થિતિ સર્જાશે તેવી આશા વ્યક્ત કરવામાં આવી રહી છે. વરસાદથી કૃષિ ક્ષેત્રમાં નવી આશાઓ જાગી છે.
હવામાન વિભાગના અનુમાન મુજબ આગામી દિવસોમાં પણ પૂર્વ કચ્છના કેટલાક વિસ્તારોમાં વરસાદી પ્રવૃત્તિ ચાલુ રહેવાની શક્યતા છે. જો ચોમાસું આ જ રીતે સક્રિય રહેશે તો ખેડૂતો ઉપરાંત જળાશયો અને પાણીના સ્ત્રોતોને પણ તેનો નોંધપાત્ર લાભ મળશે.
