સિલ્વર પાર્ક સોસાયટી પાસે બિનવારસી ગાડીમાંથી રૂ.8.21 લાખનો દારૂ મળ્યો; વાહન સહિત રૂ.11.21 લાખનો મુદ્દામાલ કબજે
મોરબી: મોરબી જિલ્લામાં દારૂની હેરાફેરી સામે એલસીબીની ટીમે મોટી કાર્યવાહી કરી છે. જુના ઘૂટું રોડ પર આવેલી સિલ્વર પાર્ક સોસાયટી પાસેથી શંકાસ્પદ હાલતમાં પાર્ક કરાયેલી સુપરકેરી માલવાહક ગાડીની તપાસ કરતા તેમાંથી દારૂની 1092 બોટલ મળી આવી હતી. પોલીસે દારૂનો જથ્થો અને વાહન સહિત કુલ રૂ.11.21 લાખનો મુદ્દામાલ કબજે કર્યો છે.
મોરબી જિલ્લા એલસીબીની ટીમ પેટ્રોલિંગમાં હતી ત્યારે પોલીસને ચોક્કસ બાતમી મળી હતી કે જુના ઘૂટું રોડ પર સિલ્વર પાર્ક સોસાયટી નજીક એક સુપરકેરી ગાડીમાં દારૂનો મોટો જથ્થો ભરવામાં આવ્યો છે. દારૂનો જથ્થો આગળ સગેવગે કરવાની તૈયારી હોવાનું પણ પોલીસને જાણવા મળ્યું હતું.
બાતમીના આધારે એલસીબીની ટીમે તાત્કાલિક સ્થળ પર પહોંચી જીજે-36-વી-5715 નંબરની સુપરકેરી ગાડીને કોર્ડન કરી તપાસ શરૂ કરી હતી. ગાડીની તલાશી દરમિયાન અલગ-અલગ બ્રાન્ડની કુલ 1092 બોટલ દારૂ મળી આવતા પોલીસે સમગ્ર જથ્થો કબજે કરી લીધો હતો.
દારૂની કિંમત રૂ.8.21 લાખ
પોલીસે કબજે કરેલા દારૂના જથ્થાની કિંમત રૂ.8,21,292 હોવાનું સામે આવ્યું છે. આ ઉપરાંત આશરે રૂ.3 લાખની કિંમતનું સુપરકેરી વાહન પણ કબજે કરવામાં આવ્યું છે.
આમ દારૂ અને વાહન સહિત પોલીસે કુલ રૂ.11,21,292નો મુદ્દામાલ જપ્ત કર્યો છે.
પોલીસ પહોંચતા પહેલાં ગાડી રેઢી મૂકીને ફરાર
એલસીબીની ટીમ કાર્યવાહી માટે સ્થળ પર પહોંચી ત્યારે ગાડી સાથે સંકળાયેલો શખ્સ ત્યાં હાજર ન હોવાનું સામે આવ્યું હતું. દારૂ ભરેલી ગાડી રેઢી મૂકીને શખ્સ ફરાર થઈ ગયો હતો.
હવે પોલીસે ફરાર શખ્સની ઓળખ અને ધરપકડ માટે તપાસ શરૂ કરી છે. દારૂનો જથ્થો ક્યાંથી લાવવામાં આવ્યો હતો, કોણે ગાડીમાં ભરાવ્યો હતો અને મોરબીમાં કોને પહોંચાડવાનો હતો તે અંગે તપાસનો દોર શરૂ કરવામાં આવ્યો છે.
દારૂના નેટવર્ક સુધી પહોંચવા તપાસ
પોલીસ દ્વારા સમગ્ર હેરાફેરી પાછળ કોણ કોણ સંડોવાયેલું છે તે જાણવા માટે તપાસ હાથ ધરવામાં આવી છે. દારૂના જથ્થાના સપ્લાયરથી લઈને તેને સગેવગે કરનાર સુધીના કનેક્શન શોધવામાં આવી રહ્યા છે.
તપાસ દરમિયાન અન્ય કોઈ વ્યક્તિની સંડોવણી સામે આવશે તો તેમની સામે પણ કાયદેસરની કાર્યવાહી કરવામાં આવશે.
આ મામલે મોરબી તાલુકા પોલીસ સ્ટેશન ખાતે ગુનો નોંધવાની કાર્યવાહી હાથ ધરવામાં આવી છે. ફરાર આરોપીને ઝડપી પાડવા માટે પોલીસ દ્વારા શોધખોળ શરૂ કરવામાં આવી છે.
આ સમગ્ર કામગીરી મોરબી જિલ્લા એલસીબીના પીઆઈ એસ.પી. જાડેજાની સૂચના મુજબ એલસીબી સ્ટાફ દ્વારા કરવામાં આવી હતી.
સિલ્વર પાર્ક સોસાયટીમાંથી દારૂ ભરેલી સુપરકેરી ઝડપાતા મોરબીના દારૂના નેટવર્ક સામે ફરી એકવાર પોલીસની મોટી કાર્યવાહી સામે આવી છે. હવે ફરાર શખ્સ ઝડપાયા બાદ દારૂના આ જથ્થા પાછળનું આખું કનેક્શન બહાર આવવાની શક્યતા છે.
