રાજકોટ: બંગાળની ખાડીમાં સક્રિય થયેલું લો-પ્રેશર હવે વધુ મજબૂત બની વેલ માર્ક્ડ લો-પ્રેશર સિસ્ટમમાં ફેરવાયું છે. જોકે, હવામાન નિષ્ણાતોના જણાવ્યા મુજબ આ સિસ્ટમનો મુખ્ય લાભ પૂર્વ અને મધ્ય ભારતના રાજ્યોને મળશે, જ્યારે ગુજરાતમાં ખાસ કરીને સૌરાષ્ટ્ર અને કચ્છ માટે હજુ પણ વ્યાપક વરસાદની સંભાવના નબળી છે.
જાણીતા વેધર એનાલિસ્ટ અશોકભાઈ પટેલના જણાવ્યા અનુસાર આગામી 22 જુલાઈ સુધી રાજ્યમાં ચોમાસાની ગતિવિધિ મર્યાદિત રહેવાની શક્યતા છે. દક્ષિણ ગુજરાતમાં મોટાભાગના વિસ્તારોમાં હળવાથી મધ્યમ વરસાદ વરસી શકે છે, જ્યારે કેટલાક સ્થળોએ ભારે વરસાદ પણ નોંધાઈ શકે છે.
સૌરાષ્ટ્ર, કચ્છ અને ઉત્તર ગુજરાતમાં અમુક દિવસો દરમિયાન માત્ર છૂટાછવાયા ઝાપટાં અથવા હળવો વરસાદ થવાની સંભાવના છે. હાલના હવામાન સંજોગોને જોતા સમગ્ર વિસ્તારમાં સાર્વત્રિક અથવા ભારે વરસાદની શક્યતા ખૂબ ઓછી હોવાનું માનવામાં આવી રહ્યું છે.
હાલ ઉત્તર-પશ્ચિમ બંગાળની ખાડી ઉપર સક્રિય સિસ્ટમ આગામી બે દિવસમાં ઉત્તર ઓડિશા અને પશ્ચિમ બંગાળ તરફ આગળ વધશે. તેના કારણે પૂર્વ અને મધ્ય ભારતના રાજ્યોમાં વરસાદનું જોર વધશે, જ્યારે ગુજરાતમાં તેની અસર મુખ્યત્વે સ્થાનિક વરસાદી ઝાપટાં સુધી મર્યાદિત રહી શકે છે.
હવામાન વિભાગના વિશ્લેષણ મુજબ દક્ષિણ-પશ્ચિમ રાજસ્થાન પર અપર એર સાયક્લોનિક સર્ક્યુલેશન અને વિવિધ ટ્રફ લાઇન સક્રિય છે, જેના કારણે ગુજરાતના કેટલાક વિસ્તારોમાં વરસાદ માટે અનુકૂળ વાતાવરણ બનશે. ઉપરાંત 19 જુલાઈથી ઉત્તર-પશ્ચિમ ભારતમાં નવી વેસ્ટર્ન ડિસ્ટર્બન્સ સક્રિય થવાની શક્યતા પણ વ્યક્ત કરવામાં આવી છે.
હાલ રાજ્યમાં ચોમાસાનો માહોલ યથાવત રહેશે, પરંતુ સૌરાષ્ટ્ર અને કચ્છના ખેડૂતોને સારા અને વ્યાપક વરસાદ માટે હજુ થોડી વધુ રાહ જોવી પડી શકે તેવી સ્થિતિ જોવા મળી રહી છે.
