ઈરાન મુદ્દે તણાવ ઓછો થવાના સંકેતથી વૈશ્વિક બજારમાં રાહત; ક્રૂડના ભાવમાં 5% સુધીનો ઘટાડો
નવી દિલ્હી: મધ્ય પૂર્વમાં તણાવ ઓછો થવાના સંકેતો વચ્ચે આંતરરાષ્ટ્રીય ક્રૂડ ઓઇલ બજારમાં મોટો ઘટાડો નોંધાયો છે. અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સામે નવા લશ્કરી હુમલાઓ હાલ પૂરતા રોકવાના સંકેત આપતાં અને શાંતિ કરારની આશા વ્યક્ત કરતાં વૈશ્વિક બજારમાં તેજીથી પ્રતિક્રિયા જોવા મળી હતી.
ટ્રમ્પના નિવેદન બાદ બ્રેન્ટ ક્રૂડનો ભાવ 5 ટકા ઘટીને 83.87 ડોલર પ્રતિ બેરલ પર પહોંચ્યો, જ્યારે યુએસ ક્રૂડ 80.79 ડોલર પ્રતિ બેરલ સુધી સરકી ગયું.
અમેરિકા, ઈઝરાયેલ અને ઈરાન વચ્ચે છેલ્લા કેટલાક મહિનાથી ચાલી રહેલા સંઘર્ષને કારણે ક્રૂડ ઓઇલના ભાવમાં ભારે ઉછાળો આવ્યો હતો. હોર્મુઝ જળમાર્ગમાં અવરોધ ઊભા થતાં વૈશ્વિક સપ્લાય પર અસર પડી હતી અને તેલના ભાવ 100 ડોલર પ્રતિ બેરલની નજીક પહોંચી ગયા હતા.
ક્રૂડ ઓઇલ મોંઘું થતાં વિશ્વભરમાં પેટ્રોલ, ડીઝલ અને જેટ ઇંધણના ભાવમાં વધારો થયો હતો, જેના કારણે પરિવહન ખર્ચ અને મોંઘવારીમાં પણ વધારો નોંધાયો હતો. હવે ભાવમાં ઘટાડો થતાં વૈશ્વિક બજારમાં રાહતની આશા વધી છે.
ભારતમાં પેટ્રોલ-ડીઝલના ભાવ પર તેની તાત્કાલિક અસર થવાની શક્યતા ઓછી છે. નિષ્ણાતોના જણાવ્યા મુજબ સ્થાનિક ઇંધણના ભાવ આંતરરાષ્ટ્રીય ક્રૂડ ઉપરાંત ડોલર સામે રૂપિયાનું મૂલ્ય, રિફાઇનિંગ ખર્ચ અને કેન્દ્ર-રાજ્ય સરકારના કર જેવા પરિબળો પર આધારિત હોય છે. તેમ છતાં, લાંબા ગાળે ક્રૂડ સસ્તુ રહે તો તેનો ફાયદો ભારતીય અર્થતંત્ર અને સામાન્ય ગ્રાહકોને મળી શકે છે.
