સાત દિવસ ગાંધીનગરમાં જ રહેવું પડશે; વિધાનસભામાં હાજરી ફરજિયાત, મીડિયા સમક્ષ નિવેદન આપવા પર પ્રતિબંધ
અમદાવાદ: દેડિયાપાડાના AAP ધારાસભ્ય ચૈતર વસાવાને ગુજરાત હાઈકોર્ટે મોટી રાહત આપી છે. વિધાનસભાના ચોમાસું સત્રમાં હાજરી આપવા માટે કરવામાં આવેલી અરજી પર સુનાવણી કરતાં કોર્ટે તેમને 7 દિવસના શરતી હંગામી જામીન મંજૂર કર્યા છે.
ચૈતર વસાવાએ વિધાનસભામાં હાજરી આપી પોતાના મતવિસ્તારના લોકોના પ્રશ્નો રજૂ કરી શકે તે માટે હંગામી જામીનની માગ કરી હતી. કોર્ટે તેમની અરજી મંજૂર કરી છે, પરંતુ સાથે કેટલીક કડક શરતો પણ મૂકી છે.
સાત દિવસ ગાંધીનગર છોડવું નહીં
કોર્ટના આદેશ મુજબ જામીનના સમયગાળા દરમિયાન ચૈતર વસાવાએ ગાંધીનગરમાં જ રહેવું પડશે. તેઓ ગાંધીનગરની બહાર જઈ શકશે નહીં. આ ઉપરાંત વિધાનસભાના ચોમાસું સત્રમાં તેમની હાજરી ફરજિયાત રહેશે.
હાઈકોર્ટે તેમને મીડિયા સાથે વાતચીત કરવા તેમજ કોઈપણ પ્રકારનું જાહેર નિવેદન આપવા પર પણ રોક લગાવી છે. એટલે કે, હંગામી જામીન દરમિયાન તેઓ કોર્ટની તમામ શરતોનું પાલન કરશે.
2023ના જમીન વિવાદથી કેસની શરૂઆત
ચૈતર વસાવા સામેનો કેસ વર્ષ 2023માં નર્મદા જિલ્લાના બોગાજ ગામ નજીકના વન વિભાગની જમીનના વિવાદ બાદ નોંધાયો હતો. સરકારી જમીન પર થયેલા અતિક્રમણ અને પાક હટાવવાના મુદ્દે સ્થાનિક લોકો અને વન વિભાગ વચ્ચે વિવાદ સર્જાયો હતો.
આ મામલે ચર્ચા કરવા માટે વન વિભાગના કર્મચારીઓને દેડિયાપાડા ખાતે પોતાના નિવાસસ્થાને બોલાવવામાં આવ્યા હોવાનો આરોપ હતો. ફરિયાદ મુજબ, ચર્ચા દરમિયાન મામલો ઉગ્ર બન્યો અને વનકર્મીઓ સાથે મારપીટ કરવામાં આવી હતી.
ફરિયાદમાં સરકારી કર્મચારીઓને ધમકાવવા માટે હવામાં ફાયરિંગ કરવામાં આવ્યું હોવાનો તેમજ ખંડણીની માગણી કરાઈ હોવાનો પણ આરોપ મૂકવામાં આવ્યો હતો. ત્યારબાદ દેડિયાપાડા પોલીસ મથકે રાયોટિંગ, આર્મ્સ એક્ટ અને ખંડણી સહિતની ગંભીર કલમો હેઠળ ગુનો નોંધાયો હતો.
સેશન્સ કોર્ટે ફટકારી હતી 7 વર્ષની સજા
આ કેસમાં 23 જૂન 2026ના રોજ રાજપીપળાની એડિશનલ સેશન્સ કોર્ટે ચૈતર વસાવા, તેમના પત્ની શકુંતલા વસાવા સહિત કુલ 9 આરોપીઓને દોષિત ઠેરવ્યા હતા.
કોર્ટે આરોપીઓને 7 વર્ષની સખત કેદની સજા ફટકારી હતી. સાથે જ અલગ-અલગ આરોપીઓની ભૂમિકા મુજબ રૂ.25 હજારથી રૂ.96 હજાર સુધીનો દંડ પણ ફટકારવામાં આવ્યો હતો.
હવે વિધાનસભાના ચોમાસું સત્રમાં હાજરી આપવા માટે હાઈકોર્ટ દ્વારા 7 દિવસના હંગામી જામીન મંજૂર થતાં ચૈતર વસાવાને સેશન્સ કોર્ટના ચુકાદા બાદ મહત્વપૂર્ણ કાનૂની રાહત મળી છે.
