મધ્યપૂર્વમાં તણાવ ઘટતાં વૈશ્વિક બજારોમાં રાહત; શેરબજારમાં મિશ્ર કારોબાર, રૂપિયો વધુ મજબૂત બન્યો
નવી દિલ્હી: મધ્યપૂર્વમાં અમેરિકા અને ઈરાન વચ્ચે તણાવ ઘટવાના સંકેતો બાદ વૈશ્વિક કોમોડિટી બજારમાં મોટું કરેક્શન જોવા મળ્યું છે. બ્રેન્ટ ક્રૂડનો ભાવ $85ની નીચે સરકતાં સોના અને ચાંદીના ભાવમાં તીવ્ર ઘટાડો નોંધાયો, જ્યારે ભારતીય શેરબજારમાં દિવસભર મર્યાદિત વધઘટ સાથે કારોબાર થયો હતો.
વૈશ્વિક બજારમાં WTI ક્રૂડ $80.24 સુધી ઘટ્યું, જ્યારે બ્રેન્ટ ક્રૂડ $85ની નીચે ટ્રેડ થતાં ઊર્જા બજારમાં નરમાઈ જોવા મળી હતી. ક્રૂડના ભાવ ઘટતાં કરન્સી માર્કેટમાં પણ સકારાત્મક અસર જોવા મળી અને ડોલર સામે રૂપિયો 7 પૈસા મજબૂત થઈ 95.82 પર પહોંચ્યો હતો.
કિંમતી ધાતુઓમાં છેલ્લા કેટલાક દિવસોની તેજી બાદ આજે ભારે વેચવાલી જોવા મળી હતી. સ્થાનિક બજારમાં સોનાના ભાવમાં ₹1,750 અને ચાંદીમાં ₹6,900નો ઘટાડો નોંધાયો હતો. વાયદા બજારમાં પણ સોનું અને ચાંદી બંનેમાં નોંધપાત્ર નરમાઈ જોવા મળી હતી.
શેરબજારમાં રોકાણકારોએ સાવચેતીભર્યો અભિગમ અપનાવતા સેન્સેક્સ 46 પોઈન્ટ ઘટીને 76,789 અને નિફ્ટી 6 પોઈન્ટ ઘટીને 23,990 પર બંધ રહ્યો હતો. જોકે, TCS, ઇન્ફોસિસ, ટાઇટન, કલ્યાણ જ્વેલર્સ અને કોફોર્જના શેરોમાં તેજી જોવા મળી હતી, જ્યારે HDFC બેંક, હિંદુસ્તાન યુનિલીવર, વરુણ બેવરેજિસ, સુઝલોન, વોડાફોન આઈડિયા અને વારી એનર્જીના શેરોમાં ઘટાડો નોંધાયો હતો.
