સુરત: હીરા ઉદ્યોગમાં ચાલી રહેલી મંદીના કારણે અનેક રત્નકલાકારો આર્થિક મુશ્કેલીઓનો સામનો કરી રહ્યા છે. આવા સમયમાં રત્નકલાકારો અને તેમના પરિવારોને સહાયરૂપ થવા માટે ડાયમંડ વર્કર યુનિયન અને રત્નકલાકાર વેલ્ફેર ટ્રસ્ટ દ્વારા અનોખી પહેલ કરવામાં આવી છે.
ટ્રસ્ટ દ્વારા આર્થિક રીતે પછાત રત્નકલાકારોના બાળકો માટે નોટબુક વિતરણ કાર્યક્રમનું આયોજન કરવામાં આવ્યું હતું. આ કાર્યક્રમ અંતર્ગત આશરે 10 હજાર વિદ્યાર્થીઓને 1 લાખ નોટબુકનું વિતરણ કરવામાં આવ્યું છે.
આ પહેલનો મુખ્ય હેતુ રત્નકલાકારોના બાળકોના શિક્ષણમાં કોઈ અવરોધ ન આવે અને પરિવારો પરનો શૈક્ષણિક ખર્ચનો બોજો ઓછો થાય તે છે. હીરા ઉદ્યોગમાં મંદીના કારણે અનેક પરિવારોની આવક પર અસર પડી છે, ત્યારે આ પ્રકારની સહાય તેમને મોટી રાહતરૂપ સાબિત થઈ રહી છે.
આ આયોજનને સફળ બનાવવા ડાયમંડ ઉદ્યોગના અગ્રણી દાતાઓ અને સામાજિક આગેવાનોનો મહત્વપૂર્ણ સહયોગ મળ્યો હતો. કાર્યક્રમ દરમિયાન આયોજકોએ જણાવ્યું હતું કે શિક્ષણ એ બાળકોના ઉજ્જવળ ભવિષ્યનો પાયો છે અને મુશ્કેલ સમયમાં પણ વિદ્યાર્થીઓના અભ્યાસને પ્રાથમિકતા આપવી જરૂરી છે.
રત્નકલાકારો અને તેમના પરિવારોએ આ પહેલને આવકારી હતી અને આયોજકો તેમજ દાતાઓનો આભાર વ્યક્ત કર્યો હતો. સમાજના વિવિધ વર્ગોમાંથી પણ આ પ્રકારની સેવાકીય પ્રવૃત્તિઓને પ્રોત્સાહન મળી રહ્યું છે.
