85 ટેસ્ટ, 90 વનડે અને 20 T20 બાદ 13 વર્ષની કારકિર્દીનો અંત; ઓસ્ટ્રેલિયામાં ઐતિહાસિક ટેસ્ટ સિરીઝ જીત યાદગાર બની
નવી દિલ્હી: ભારતીય ક્રિકેટ ટીમના અનુભવી બેટ્સમેન અને પૂર્વ ટેસ્ટ કેપ્ટન અજિંક્ય રહાણેએ આંતરરાષ્ટ્રીય ક્રિકેટમાંથી નિવૃત્તિ જાહેર કરી છે. 38 વર્ષીય રહાણેએ સોશિયલ મીડિયા પર ભાવુક પોસ્ટ શેર કરીને તમામ ફોર્મેટના ઇન્ટરનેશનલ ક્રિકેટને અલવિદા કહેવાનો નિર્ણય જાહેર કર્યો છે.
રહાણેએ વર્ષ 2013માં ભારતીય ટીમ માટે ટેસ્ટ ક્રિકેટમાં ડેબ્યૂ કર્યું હતું. પોતાની કારકિર્દી દરમિયાન તેમણે 85 ટેસ્ટ, 90 વનડે અને 20 T20 આંતરરાષ્ટ્રીય મેચોમાં ભારતનું પ્રતિનિધિત્વ કર્યું હતું. જુલાઈ 2023માં વેસ્ટ ઇન્ડિઝ સામે રમાયેલી ટેસ્ટ સિરીઝ તેમની છેલ્લી આંતરરાષ્ટ્રીય શ્રેણી રહી હતી.
ટીમમાંથી બહાર થયા બાદ પણ રહાણેએ ઘરેલું ક્રિકેટમાં પોતાની હાજરી જાળવી રાખી હતી અને 2024-25ની રણજી ટ્રોફીમાં મુંબઈ ટીમની કપ્તાની સંભાળી હતી.
અજિંક્ય રહાણેનું નામ ભારતીય ક્રિકેટના ઇતિહાસમાં ખાસ કરીને 2020-21ની ઓસ્ટ્રેલિયા ટેસ્ટ સિરીઝમાં ઐતિહાસિક જીત માટે હંમેશા યાદ રહેશે. મુશ્કેલ પરિસ્થિતિમાં ટીમનું સફળ નેતૃત્વ કરીને તેમણે ભારતને યાદગાર વિજય અપાવ્યો હતો.
મુંબઈની લોકલ ટ્રેનમાં મુસાફરી કરતો એક યુવા ક્રિકેટરથી ભારતીય ટીમના કેપ્ટન સુધી પહોંચેલી રહાણેની સફર અનેક યુવા ખેલાડીઓ માટે પ્રેરણાસ્ત્રોત બની છે. તેમની નિવૃત્તિ સાથે ભારતીય ક્રિકેટના એક મહત્વપૂર્ણ અધ્યાયનો અંત આવ્યો છે.
