અદાણી ઇન્ફ્રાસ્ટ્રક્ચર પણ 1 અબજ ડોલરનું ઋણ લઈ શકે; વૈશ્વિક અને ભારતીય બેંકો સાથે વાટાઘાટો
મુંબઈઃ ગૌતમ અદાણીની આગેવાની હેઠળનું અદાણી ગ્રુપ સિમેન્ટ બિઝનેસ માટે અગાઉ લેવામાં આવેલી લોનને રિફાઇનાન્સ કરવા માટે મોટી વિદેશી લોન મેળવવાની તૈયારીમાં છે. અહેવાલો અનુસાર, ગ્રુપ કુલ 2.5 અબજ ડોલરનું વિદેશી ઋણ લેવાની યોજના બનાવી રહ્યું છે. અંબુજા સિમેન્ટ્સ અને ACCના અધિગ્રહણ માટે લેવામાં આવેલી જૂની લોનના રિફાઇનાન્સિંગ માટે આ ભંડોળનો ઉપયોગ થઈ શકે છે.
મોરેશિયસની કંપની પાસેથી 1.5 અબજ ડોલર
બ્લૂમબર્ગના અહેવાલ મુજબ, અદાણી ગ્રુપની મોરેશિયસ સ્થિત કંપની એન્ડેવર ટ્રેડ એન્ડ ઈન્વેસ્ટમેન્ટ પાસેથી આશરે 1.5 અબજ ડોલરનું ઋણ મેળવવાની ચર્ચા ચાલી રહી છે. આ લોનની મુદત 18થી 24 મહિના સુધીની હોઈ શકે છે.
આ ઉપરાંત, લોનની ચુકવણી અથવા આગળના રિફાઇનાન્સિંગ માટે ભારતીય બેંકો પાસેથી ભંડોળ મેળવવાની શક્યતા છે. SBI અને HDFC બેંક સહિતની બેંકો આ વ્યવહારમાં સામેલ થઈ શકે છે.
ECB હેઠળ વધુ 1 અબજ ડોલરનું ઋણ
અદાણી ઇન્ફ્રાસ્ટ્રક્ચર પણ આશરે 1 અબજ ડોલરની વિદેશી લોન લઈ શકે છે. આ ભંડોળ RBIની External Commercial Borrowing (ECB) વ્યવસ્થા હેઠળ મેળવવાની યોજના હોવાનું અહેવાલમાં જણાવાયું છે.
આ માટે DBS અને Standard Chartered સહિતની વૈશ્વિક બેંકો સાથે ચર્ચા ચાલી રહી છે. સમગ્ર ડીલ ઓક્ટોબરના અંત સુધીમાં પૂર્ણ થવાની સંભાવના વ્યક્ત કરવામાં આવી છે.
ત્રણ વર્ષ બાદ બોન્ડ માર્કેટમાં રિલાયન્સની એન્ટ્રી
દરમિયાન, મુકેશ અંબાણીની રિલાયન્સ ઇન્ડસ્ટ્રીઝ પણ લાંબા સમય બાદ બોન્ડ માર્કેટમાં પરત ફરવાની તૈયારી કરી રહી છે. કંપની આશરે રૂ.12,500 કરોડ બોન્ડ દ્વારા એકત્ર કરવાની યોજના ધરાવે છે.
નવેમ્બર 2023 બાદ કંપની પ્રથમ વખત બોન્ડ ઓફર કરવાની તૈયારીમાં છે. અગાઉ 2023માં રિલાયન્સે બોન્ડ મારફત આશરે રૂ.20,000 કરોડ એકત્ર કર્યા હતા. હવે નવી બોન્ડ ઓફર દ્વારા કંપની ફરી મોટું ભંડોળ ઊભું કરશે.
