નવી દિલ્હીઃ રશિયા પાસેથી ક્રૂડ ઓઇલ ખરીદતા દેશો પર 100% સુધીનો ટેરિફ લાદવાની જોગવાઈ ધરાવતું લિન્ડસે ગ્રેહામ બિલ અમેરિકી સેનેટમાં 86-11 મતથી પસાર થયા બાદ હવે હાઉસ ઓફ રિપ્રેઝન્ટેટિવ્સમાં મતદાનના તબક્કે પહોંચ્યું છે. બિલ પસાર થયા બાદ રશિયન ક્રૂડ ખરીદતા દેશો સામે કાર્યવાહી કરવાની સત્તા અમેરિકી રાષ્ટ્રપતિને મળી શકે છે.
ભારતે આ સમગ્ર મામલે પોતાનું વલણ સ્પષ્ટ રાખ્યું છે. ભારત સરકારના જણાવ્યા મુજબ દેશની ઊર્જા જરૂરિયાતોને ધ્યાનમાં રાખીને ક્રૂડ ઓઇલની આયાત અંગેના નિર્ણયો લેવામાં આવશે અને અમેરિકાના સંભવિત ટેરિફના કારણે ભારતની ઊર્જા નીતિમાં ફેરફાર થવાનો નથી.
અમેરિકાનો તર્ક છે કે ભારત સહિતના દેશો રશિયા પાસેથી ક્રૂડ ખરીદીને રશિયાની અર્થવ્યવસ્થાને ટેકો આપી રહ્યા છે. બીજી તરફ ભારત પોતાની ઊર્જા સુરક્ષા અને ઉપલબ્ધ વિકલ્પોના આધારે ક્રૂડ ઓઇલની ખરીદી કરે છે.
ક્રૂડના ભાવમાં તેજીથી ભારતની ચિંતા વધી
મધ્યપૂર્વના સંઘર્ષ વચ્ચે વૈશ્વિક ક્રૂડ ઓઇલના ભાવ પણ ઊંચા સ્તરે રહ્યા છે. ક્રૂડના ભાવમાં લાંબા સમય સુધી તેજી જળવાય તો ભારતના આયાત બિલ પર દબાણ વધી શકે છે. તેની અસર પેટ્રોલિયમ કંપનીઓના ખર્ચ અને દેશમાં મોંઘવારી પર પણ પડી શકે છે.
આ ઉપરાંત હોર્મુઝ સહિતના મહત્વપૂર્ણ દરિયાઈ માર્ગો પર સપ્લાયમાં વિક્ષેપ સર્જાય તો વૈશ્વિક ઊર્જા બજાર પર વધુ દબાણ ઊભું થવાની શક્યતા છે. ભારત સહિત વિશ્વના અનેક દેશો ક્રૂડ સપ્લાય અને ભાવની સ્થિતિ પર નજર રાખી રહ્યા છે.
