નવી દિલ્હીઃ દિશા સાલિયાનના શંકાસ્પદ મોતના કેસમાં CBIએ FIR નોંધતા મહારાષ્ટ્રના રાજકારણમાં ભારે ગરમાવો આવ્યો છે. FIRમાં પૂર્વ મુખ્યમંત્રી ઉદ્ધવ ઠાકરેના પુત્ર અને પૂર્વ મંત્રી આદિત્ય ઠાકરે સહિત અનેક રાજકીય નેતાઓ, વરિષ્ઠ પોલીસ અધિકારીઓ અને બોલિવૂડ સાથે સંકળાયેલા લોકોની ભૂમિકાની તપાસનો ઉલ્લેખ કરવામાં આવ્યો છે.
ગેંગરેપ, હત્યા અને પુરાવા નષ્ટ કરવાના આરોપોની તપાસ
CBIની FIRમાં સમગ્ર કેસમાં ગેંગરેપ, હત્યા, ગુનાહિત કાવતરું, સત્તાના દુરુપયોગ અને પુરાવા સાથે ચેડાં જેવા ગંભીર આરોપોની તપાસ કરવામાં આવશે. દિશા સાલિયાનના મોતને આત્મહત્યા તરીકે રજૂ કરવા પાછળ કોઈ કાવતરું હતું કે નહીં તેની પણ તપાસનો મુદ્દો છે.
તપાસ એજન્સી એ પણ તપાસશે કે શું સરકારી તંત્ર અને સત્તાનો ઉપયોગ કરીને કેસને દબાવવાનો અથવા તપાસની દિશા બદલવાનો પ્રયાસ કરવામાં આવ્યો હતો.
SITની કામગીરી પણ શંકાના ઘેરામાં
FIRમાં અગાઉ રચાયેલી SITના વરિષ્ઠ અધિકારીઓ તથા તપાસની દેખરેખ રાખનારા પોલીસ અધિકારીઓની ભૂમિકા પણ તપાસ હેઠળ રાખવામાં આવી છે. તપાસ દરમિયાન કથિત રીતે જાણીજોઈને તપાસને ખોટી દિશામાં વાળવામાં આવી હતી કે નહીં અને મહત્વના પુરાવાઓ સાથે કોઈ ચેડાં થયા હતા કે નહીં તેની ચકાસણી કરવામાં આવશે.
આ ઉપરાંત ગુનામાં સામેલ હોવા છતાં હાલ ઓળખ બહાર ન આવી હોય તેવા અજાણ્યા લોકોની ભૂમિકા પણ તપાસવામાં આવશે.
દિશાના મોતના થોડા દિવસ બાદ સુશાંતનું મોત
દિશા સાલિયાનનું મોત જૂન 2020માં મુંબઈમાં થયું હતું. તેના થોડા જ દિવસો બાદ અભિનેતા સુશાંત સિંહ રાજપૂતનું શંકાસ્પદ મોત થયું હતું. બંને ઘટનાઓ વચ્ચે કોઈ કડી હોવાની અટકળો ત્યારથી ચાલી રહી છે.
હવે CBIની FIRમાં ગંભીર આરોપો અને અનેક લોકોની ભૂમિકાની તપાસનો ઉલ્લેખ થતાં આ કેસ ફરી ચર્ચાના કેન્દ્રમાં આવ્યો છે. મહારાષ્ટ્રની રાજનીતિથી લઈને બોલિવૂડ સુધી સૌની નજર હવે CBIની તપાસના આગામી ખુલાસાઓ પર છે.
