નવી દિલ્હીઃ દેશના સામાન્ય લોકો પર મોંઘવારીનો વધુ એક માર પડ્યો છે. ઓગસ્ટ મહિનામાં રિટેલ મોંઘવારી વધીને 4.82% પર પહોંચી છે. જુલાઈમાં આ દર 4.45% હતો. ખાદ્ય ચીજોના ભાવમાં વધારાને કારણે મોંઘવારી પર ફરી દબાણ વધ્યું છે.
ઓગસ્ટમાં ખાદ્ય મોંઘવારી દર પણ વધ્યો છે. જુલાઈમાં 5.52% રહેલો ખાદ્ય મોંઘવારી દર ઓગસ્ટમાં વધીને 5.95% થયો છે. ગ્રામ્ય વિસ્તારમાં ખાદ્ય મોંઘવારી 5.64%, જ્યારે શહેરી વિસ્તારમાં 6.13% નોંધાઈ છે.
ડુંગળીના ભાવમાં સીધો ડબલથી વધુ વધારો
મોંઘવારી વધારવામાં ડુંગળી અને લસણના ભાવનો મોટો ફાળો રહ્યો છે. ડુંગળીની મોંઘવારી જુલાઈના 22.54%થી વધીને ઓગસ્ટમાં 48.27% થઈ ગઈ છે. એટલે કે એક જ મહિનામાં ડુંગળીના ભાવ સંબંધિત મોંઘવારીમાં મોટો ઉછાળો આવ્યો છે.
લસણની મોંઘવારી પણ 35.36%થી વધીને 43.60% થઈ છે. જોકે આદુના ભાવમાં થોડી રાહત મળી છે. આદુની મોંઘવારી 83.57%થી ઘટીને 73.82% થઈ છે.
ટામેટાં-બટાકામાં ભાવ ઘટ્યા
ડુંગળી અને લસણ મોંઘા થયા હોવા છતાં કેટલીક શાકભાજીના ભાવમાં ઘટાડો થયો છે. ટામેટાના ભાવમાં ઓગસ્ટમાં 31.09%નો ઘટાડો નોંધાયો છે, જ્યારે જુલાઈમાં ઘટાડો 4.60% હતો.
બટાકાની મોંઘવારી -13.14% રહી છે. જુલાઈમાં આ આંકડો -16.56% હતો. ભીંડાના ભાવમાં પણ 5.41%નો ઘટાડો નોંધાયો છે.
ખાંડના વધતા ભાવે ચિંતા વધારી
ખાંડના ભાવમાં પણ વધારો મોંઘવારી માટે ચિંતાનો વિષય બન્યો છે. ઘરેલુ બજારમાં ભાવને નિયંત્રણમાં રાખવા માટે ભારતે ખાંડની નિકાસ પર નિયંત્રણ મૂક્યું છે, જે સપ્ટેમ્બરના અંત સુધી અમલમાં રહેવાનું છે. ખાંડના ભાવમાં વધારો પણ મોંઘવારી પર દબાણ વધારી રહ્યો છે.
હવે ચોમાસું અને ક્રૂડ ઓઈલ પર નજર
આગામી મહિનાઓમાં મોંઘવારીની દિશા મુખ્યત્વે ચોમાસું, કૃષિ ઉત્પાદન અને ખાદ્ય ચીજોના પુરવઠા પર નિર્ભર રહેશે. સામાન્ય ચોમાસાથી પાકનું ઉત્પાદન સારું રહે તો ભાવ પર દબાણ ઘટી શકે છે. જોકે અનિયમિત વરસાદ અને હવામાનમાં મોટા ફેરફારથી શાકભાજી તથા અન્ય કૃષિ ઉત્પાદનોના ભાવ વધી શકે છે.
બીજી તરફ આંતરરાષ્ટ્રીય ક્રૂડ ઓઈલના ભાવમાં વધારો પણ ભારત માટે મોટું જોખમ બની શકે છે. ક્રૂડ મોંઘું થવાથી ઈંધણ અને પરિવહન ખર્ચ વધશે અને તેની અસર અન્ય ચીજવસ્તુઓના ભાવ પર પણ પડી શકે છે.
FY27 માટે RBIનો અંદાજ 5%
RBIએ નાણાકીય વર્ષ 2027 માટે મોંઘવારીનો અંદાજ અગાઉના 5.1%થી ઘટાડીને 5% કર્યો છે. ક્રૂડ ઓઈલના ભાવમાં નરમાઈ અને સપ્લાય સંબંધિત દબાણમાં ઘટાડાને ધ્યાનમાં રાખીને આ ફેરફાર કરવામાં આવ્યો છે.
RBIના અનુમાન મુજબ નજીકના સમયમાં હેડલાઇન મોંઘવારીમાં વધારો થઈ શકે છે, પરંતુ ત્યારબાદ તેમાં ઘટાડો જોવા મળવાની શક્યતા છે.
