સિંહસ્થ કુંભ પહેલાં રોડ વિસ્તરણ માટે મંદિરનું માળખું હટાવાયું; ભક્તો બોલ્યા- આ ચમત્કાર, SDMએ કહ્યું- મૂર્તિ હટાવવાનો કોઈ પ્રયાસ જ કર્યો નથી
ઉજ્જૈનઃ સિંહસ્થ કુંભમેળા-2028ની તૈયારીઓ વચ્ચે મહાકાલની નગરી ઉજ્જૈનમાં ખડે હનુમાન મંદિરને લઈને એક અનોખો ઘટનાક્રમ ચર્ચામાં આવ્યો છે. રોડ વિસ્તરણ માટે મંદિરનું માળખું હટાવી દેવામાં આવ્યું હોવા છતાં ગર્ભગૃહમાં બિરાજમાન ભગવાન હનુમાનજીની મૂર્તિ હજુ પણ પોતાની જગ્યાએ અડીખમ છે. આ ઘટનાને લઈને સ્થાનિક ભક્તોમાં ભારે ઉત્સુકતા જોવા મળી રહી છે.
મંદિરના પૂજારી અને સ્થાનિક લોકોનો દાવો છે કે મૂર્તિને ખસેડવા માટે ભારે મશીનરીનો ઉપયોગ કરવામાં આવ્યો હતો, પરંતુ મૂર્તિ પોતાની જગ્યાથી ખસી નહીં. છેલ્લા કેટલાક દિવસોમાં મૂર્તિને ખસેડવાના ચાર પ્રયાસો નિષ્ફળ ગયાનો પણ દાવો કરવામાં આવી રહ્યો છે. જોકે, તંત્રએ આ દાવાને નકારી કાઢ્યો છે અને મૂર્તિ હટાવવાનો અત્યાર સુધી કોઈ પ્રયાસ કર્યો જ નથી તેમ સ્પષ્ટ કર્યું છે.
ભક્તોમાં ‘ચમત્કાર’ની ચર્ચા
મૂર્તિ અડીખમ રહેવાના વીડિયો સોશિયલ મીડિયા પર વાયરલ થતાં સમગ્ર મામલો ચર્ચામાં આવ્યો છે. ભક્તો આ ઘટનાને ભગવાન હનુમાનજીનો દૈવી સંકેત અને ચમત્કાર ગણાવી રહ્યા છે. દરમિયાન ઘટનાસ્થળ નજીક વાનરોનું મોટું ટોળું જોવા મળતાં સોશિયલ મીડિયા પર પણ આ ઘટનાને લઈને વિવિધ પ્રકારની ધાર્મિક ચર્ચાઓ તેજ બની છે.
મંદિરના પૂજારી મહેશ બૈરાગીએ જણાવ્યું કે ભગવાન હનુમાનજી અહીં જ રહેવા માગે છે તેવા સંકેતો મળી રહ્યા છે. તેમણે તંત્રને મૂર્તિ સાથે કોઈ પ્રકારની બળજબરી ન કરવા અપીલ કરી છે. જો મૂર્તિનું સ્થાનાંતરણ જરૂરી બને તો તેને હાલની સ્થિતિ અને સ્વરૂપમાં સંપૂર્ણ સુરક્ષિત રીતે ખસેડવામાં આવે તેવી તેમની માંગ છે.
હવે ટેક્નોલોજીની મદદથી થશે તપાસ
મૂર્તિના પાયા અંગે રહસ્ય ઉકેલવા હવે વૈજ્ઞાનિક પદ્ધતિનો સહારો લેવામાં આવશે. મૂર્તિ અને તેની આસપાસના સ્ટ્રક્ચરનું આધુનિક સાધનો વડે સ્કેનિંગ કરવામાં આવશે. મૂર્તિ જમીન સાથે કઈ રીતે જોડાયેલી છે અને તેને સુરક્ષિત રીતે ખસેડી શકાય કે નહીં તે અંગે નિષ્ણાતો અભ્યાસ કરશે.
હાલ મૂર્તિને ખુલ્લા આકાશ અને વાતાવરણથી બચાવવા માટે સ્થળ પર કામચલાઉ કેનોપી પણ ગોઠવવામાં આવી છે.
SDMનું નિવેદનઃ ‘અમે એક પણ પ્રયાસ કર્યો નથી’
સોશિયલ મીડિયા પર તંત્ર દ્વારા મૂર્તિ હટાવવાના પ્રયાસોના દાવા વચ્ચે ઉજ્જૈનના SDM ગર્ગે મહત્વનું સ્પષ્ટીકરણ આપ્યું છે. તેમણે કહ્યું કે તંત્ર દ્વારા અત્યાર સુધી હનુમાનજીની મૂર્તિ હટાવવા માટે કોઈ પ્રયાસ કરવામાં આવ્યો નથી.
તેમણે વધુમાં જણાવ્યું કે ધાર્મિક આસ્થા અને લોકોની ભાવનાઓનું સંપૂર્ણ ધ્યાન રાખવામાં આવશે. વૈજ્ઞાનિકો અને નિષ્ણાતોની સલાહ લીધા બાદ જ મૂર્તિના સ્થાનાંતરણ અંગે કોઈ નિર્ણય લેવામાં આવશે. તેથી હાલ ભક્તો માટે આ ઘટના ‘ચમત્કાર’ બની છે, જ્યારે તંત્ર તેના પાછળનું વાસ્તવિક કારણ વૈજ્ઞાનિક તપાસ દ્વારા જાણવા આગળ વધી રહ્યું છે.
