રાજકોટ મહાનગરપાલિકામાં નવા શાસકોની કામગીરીને લઈને લોકોમાં નારાજગી જોવા મળી રહી છે. શહેરના વિવિધ વોર્ડમાં લોકોને સીધી અસર કરતાં વિકાસકામોને બ્રેક લાગતાં ભાજપના સમર્થક મતદારોમાં પણ રોષ ફેલાયો હોવાની ચર્ચા છે. વિકાસકામોની ગતિ ધીમી પડતાં શહેરમાં વિકાસને જાણે ઊંધો ગતિ મળી હોય તેવું ચિત્ર ઉપસી રહ્યું છે.
શહેરના અનેક વિસ્તારોમાં રસ્તા, ડ્રેનેજ, પાણી, સ્ટ્રીટલાઇટ સહિતના રોજિંદા જીવનને સ્પર્શતા કામો અટકેલા અથવા ધીમી ગતિએ ચાલી રહ્યા હોવાની ફરિયાદો ઉઠી રહી છે. જેના કારણે સ્થાનિક લોકો અને ચૂંટાયેલા પ્રતિનિધિઓ વચ્ચે પણ અસંતોષ વધતો હોવાનું ચર્ચાઈ રહ્યું છે.
રાજકોટના તમામ વોર્ડમાં લોકોની સીધી જરૂરિયાત સાથે જોડાયેલા વિકાસકામો સમયસર પૂર્ણ થાય તેવી અપેક્ષા છે. પરંતુ કામોમાં વિલંબ થતાં લોકોમાં હવે સવાલો ઊઠી રહ્યા છે કે શહેરના વિકાસને પ્રાથમિકતા આપવામાં આવી રહી છે કે નહીં.
યુનિવર્સિટી અને કોર્પોરેશનનું રાજકારણ અલગ
રાજકીય વર્તુળોમાં એવી પણ ચર્ચા છે કે યુનિવર્સિટીનું રાજકારણ અને મહાનગરપાલિકાનું રાજકારણ બંનેની દિશા અને કાર્યપદ્ધતિ અલગ હોય છે. યુનિવર્સિટીના રાજકારણમાં સંગઠન અને ચોક્કસ મતદાર સમીકરણો મહત્વ ધરાવે છે, જ્યારે કોર્પોરેશનનું રાજકારણ સીધું લોકોના રોજિંદા પ્રશ્નો અને સ્થાનિક વિકાસ સાથે જોડાયેલું હોય છે.
મહાનગરપાલિકામાં મતદારોને રસ્તા, પાણી, સફાઈ, ગટર, લાઇટ અને અન્ય મૂળભૂત સુવિધાઓના આધારે કામગીરીનો સીધો અનુભવ થાય છે. તેથી લોકોના હૃદય સુધી પહોંચવા માટે સ્થાનિક પ્રશ્નોનું ઝડપી નિરાકરણ અને દેખાય તેવો વિકાસ જરૂરી બની રહે છે. હાલમાં વિકાસકામોમાં આવેલી મંદગતિને કારણે આ મુદ્દો આગામી સમયમાં રાજકીય રીતે પણ મહત્વનો બની શકે છે.
