રાજકોટ: શહેરના વોર્ડ નં. 9 સ્થિત ગંગોત્રી પાર્ક વિસ્તારમાં કથિત ગેરકાયદે બાંધકામના મુદ્દે ફરી વિવાદ ઊભો થયો છે. સોસાયટી પ્રમુખ અને ભાજપ અગ્રણી બહાદુરભાઈ માંજરીયાએ આક્ષેપ કર્યો છે કે મૌખિક તેમજ લેખિત રજૂઆતો કરવા છતાં નિયમો વિરુદ્ધનું બાંધકામ યથાવત ચાલુ છે.
બહાદુરભાઈ માંજરીયાએ વધુ એક ફરિયાદ કરીને જણાવ્યું છે કે સંબંધિત વિભાગ સમક્ષ અનેક વખત રજૂઆત કરવા છતાં અસરકારક કાર્યવાહી કરવામાં આવી નથી. તેમણે સમગ્ર મામલે પારદર્શક તપાસ કરીને જવાબદાર અધિકારીઓ સામે પગલાં ભરવાની માંગ કરી છે.
ફરિયાદમાં તેમણે એવો પણ આક્ષેપ કર્યો છે કે જો નિયમોના ભંગ સામે કાર્યવાહી નહીં થાય તો તેનાથી તંત્રની કામગીરી અંગે પ્રશ્નો ઊભા થશે અને પક્ષની છબીને પણ નુકસાન પહોંચશે. જરૂર પડશે તો સમગ્ર મામલાની વિગતો જાહેર કરવાની પણ તેમણે ચેતવણી આપી છે.
જોકે, આક્ષેપોને લઈને રાજકોટ મહાનગરપાલિકાના ટાઉન પ્લાનિંગ વિભાગ અથવા સંબંધિત અધિકારીઓ તરફથી હજુ સુધી કોઈ સત્તાવાર પ્રતિક્રિયા સામે આવી નથી.
