ઓનલાઈન સ્વ-નોંધણીની પણ મળશે સુવિધા; માતા-પિતાના જન્મસ્થળ અને જન્મતારીખની માહિતી પણ નોંધાશે
નવી દિલ્હી: દેશની જનગણના-2027નો બીજો તબક્કો 17 ઓગસ્ટથી શરૂ થશે. આ વખતે 1931 પછી પ્રથમવાર જાતિ આધારિત માહિતી પણ એકત્રિત કરવામાં આવશે. ઉપરાંત નાગરિકોના માતા-પિતાના જન્મસ્થળ અને જન્મતારીખની વિગતો પણ નોંધવામાં આવશે.
ગૃહ મંત્રાલયની સૂચના અનુસાર 17થી 30 ઓગસ્ટ દરમિયાન લોકો પોતે ઓનલાઈન પોતાની માહિતી નોંધાવી શકશે. ત્યારબાદ લદ્દાખ, જમ્મુ-કાશ્મીર, હિમાચલ પ્રદેશ અને ઉત્તરાખંડમાં 1થી 30 સપ્ટેમ્બર દરમિયાન મેદાની ગણતરી હાથ ધરાશે.
અધિકારીઓના જણાવ્યા મુજબ, વ્યક્તિ જે જાતિ જણાવશે તે જ નોંધવામાં આવશે. SC અને ST માટે અલગ સત્તાવાર યાદી રહેશે, જ્યારે અન્ય જાતિઓ માટે અલગ નોંધણી કરવામાં આવશે. કોઈપણ વ્યક્તિ પાસેથી જાતિનું પ્રમાણપત્ર કે અન્ય દસ્તાવેજ માંગવામાં આવશે નહીં.
સરકાર આ વખતે AI અને ડિજિટલ ટેક્નોલોજીની મદદથી હજારો જાતિઓના ડેટાનું વર્ગીકરણ અને વિશ્લેષણ કરશે. 2011ની સામાજિક-આર્થિક અને જાતિ આધારિત ગણતરી દરમિયાન 45 હજારથી વધુ અલગ-અલગ જાતિના નામ નોંધાયા હતા.
જનગણના દરમિયાન પાસપોર્ટ ધરાવતા નાગરિકોનો પાસપોર્ટ નંબર પણ નોંધાઈ શકે છે, જ્યારે આધાર નંબર આપવો સંપૂર્ણપણે સ્વૈચ્છિક રહેશે. માતા-પિતાની જન્મતારીખ અથવા જન્મસ્થળ અંગે કોઈ દસ્તાવેજ માંગવામાં આવશે નહીં અને ઉપલબ્ધ માહિતીના આધારે જ નોંધણી કરવામાં આવશે.
