રાજકોટ: રાજકોટ ગ્રામ્ય જિલ્લામાં દારૂની હેરાફેરી સામે પોલીસે વધુ એક મોટી કાર્યવાહી હાથ ધરી છે. ગ્રામ્ય એલસીબીની ટીમે વિંછિયા પોલીસ મથક હદમાં આવેલા હિંગોળગઢ નજીક વીડી વિસ્તારમાં દરોડો પાડી અંદાજે રૂ.25.60 લાખ કિંમતનો વિદેશી દારૂનો જથ્થો કબજે કર્યો છે. જોકે, પોલીસ પહોંચે તે પહેલાં જ હેરાફેરીમાં સંકળાયેલા શખ્સો સ્થળ પરથી ફરાર થઈ જતા તેમની શોધખોળ શરૂ કરવામાં આવી છે.
પોલીસને મળેલી ચોક્કસ બાતમીના આધારે હિંગોળગઢથી ગુંદાળા જતાં માર્ગ પર આવેલા વીડી વિસ્તારમાં કાર્યવાહી કરવામાં આવી હતી. તપાસ દરમિયાન ખુલ્લા વિસ્તારમાંથી 311 પેટીમાં ભરેલી કુલ 3,732 વિદેશી દારૂની બોટલો મળી આવી હતી. પોલીસે સમગ્ર જથ્થો કબજે કરીને સ્થળનું પંચનામું કર્યું હતું.
પ્રાથમિક તપાસમાં સામે આવ્યું છે કે દારૂનો આ જથ્થો અન્ય સ્થળે પહોંચાડવાની તૈયારી ચાલી રહી હતી. પરંતુ એલસીબીની ટીમ અચાનક પહોંચી જતાં બુટલેગરો દારૂનો જથ્થો મૂકીને નાસી છૂટ્યા હતા. હાલ પોલીસ આસપાસના વિસ્તારોના CCTV ફૂટેજ તેમજ અન્ય ટેક્નિકલ પુરાવાના આધારે આરોપીઓ સુધી પહોંચવાના પ્રયાસો કરી રહી છે.
આ સમગ્ર કાર્યવાહી જિલ્લા પોલીસ વડા વિજયસિંહ ગુર્જરના માર્ગદર્શન હેઠળ ગ્રામ્ય એલસીબીના પીઆઈ જે.પી. રાવની આગેવાનીમાં હાથ ધરવામાં આવી હતી. જિલ્લામાં દારૂ અને અન્ય ગેરકાયદે પ્રવૃત્તિઓ સામે ચાલી રહેલા વિશેષ અભિયાન હેઠળ આ ઓપરેશન સફળ રહ્યું હોવાનું પોલીસે જણાવ્યું છે.
પોલીસે કબજે કરાયેલા દારૂની કુલ કિંમત રૂ.25,60,152 હોવાનું જાહેર કર્યું છે. સમગ્ર મામલે વિંછિયા પોલીસ સ્ટેશનમાં પ્રોહિબિશન એક્ટ હેઠળ ગુનો નોંધી દારૂના મૂળ સપ્લાયર, પરિવહન નેટવર્ક અને તેમાં સંકળાયેલા અન્ય શખ્સોની શોધખોળ શરૂ કરવામાં આવી છે.
રાજકોટ ગ્રામ્ય વિસ્તારમાં છેલ્લા કેટલાક સમયથી દારૂની હેરાફેરીના મોટા કેસ સતત સામે આવી રહ્યા છે. પોલીસનું કહેવું છે કે બુટલેગરો સામે કડક કાર્યવાહી ચાલુ રહેશે અને ગેરકાયદે દારૂના સમગ્ર નેટવર્કને તોડી પાડવા માટે વિશેષ અભિયાન વધુ તેજ બનાવવામાં આવશે.
