મોરબી: મોરબી જિલ્લામાં આજે વહેલી સવારથી જ વાતાવરણમાં નોંધપાત્ર ફેરફાર જોવા મળ્યો હતો. વાદળછાયા આકાશ વચ્ચે અનેક વિસ્તારોમાં વરસાદી ઝાપટાં વરસતાં લોકોને કાળઝાળ ગરમી અને ઉકળાટમાંથી રાહત મળી હતી. વરસાદના આગમન સાથે સમગ્ર જિલ્લામાં ફરી એકવાર ચોમાસાનો માહોલ છવાઈ ગયો હતો.
મોરબી શહેર ઉપરાંત ટંકારા તાલુકાના વિસ્તારોમાં પણ મેઘરાજાએ મન મૂકીને મહેર વરસાવી હતી. મહેન્દ્રનગર, વાવડી, રવાપર, લીલાપર, રાજપર સહિતના અનેક ગામોમાં સારો વરસાદ નોંધાતા રસ્તાઓ ભીના બન્યા હતા અને વાતાવરણમાં ઠંડક પ્રસરી ગઈ હતી.
છેલ્લા કેટલાક દિવસોથી ગરમી અને ભેજના કારણે લોકો પરેશાન હતા, ત્યારે વરસાદ શરૂ થતાં લોકોને મોટી રાહત મળી છે. વરસાદના કારણે બજારો, રહેણાંક વિસ્તારો અને ગ્રામ્ય વિસ્તારોમાં ખુશીનો માહોલ જોવા મળ્યો હતો.
ખેડૂતો માટે પણ આ વરસાદ આશીર્વાદ સમાન સાબિત થયો છે. ખેતી માટે જરૂરી ભેજ મળતાં વાવેતર અને પાકના વિકાસને ગતિ મળશે તેવી આશા વ્યક્ત કરવામાં આવી રહી છે. ખાસ કરીને ચોમાસા આધારિત ખેતી કરતા ખેડૂતોમાં વરસાદને લઈને આશાવાદ જોવા મળ્યો હતો.
હવામાન વિભાગના અનુમાન મુજબ જિલ્લામાં આગામી દિવસોમાં પણ વરસાદી પ્રવૃત્તિ યથાવત રહેવાની સંભાવના છે. જો વરસાદનો આ જ ક્રમ ચાલુ રહેશે તો કૃષિ ક્ષેત્રને મોટો લાભ મળશે અને પાણીના સ્ત્રોતોમાં પણ વધારો થવાની શક્યતા છે.
