નખત્રાણા: પશ્ચિમ કચ્છ લોકલ ક્રાઈમ બ્રાન્ચ (LCB)એ નખત્રાણા તાલુકાના નાગલપર ગામની સીમમાં જુગાર રમતા છ ઇસમોને ઝડપી પાડી સફળ કાર્યવાહી હાથ ધરી છે. પોલીસે તળાવડી નજીક દરોડો પાડી જુગાર રમતા આરોપીઓને રંગેહાથ ઝડપી લીધા હતા.
દરોડા દરમિયાન પોલીસે સ્થળ પરથી કુલ રૂ.1.86 લાખનો મુદ્દામાલ કબજે કર્યો હતો. જપ્ત કરાયેલા મુદ્દામાલમાં રોકડ રકમ, મોબાઇલ ફોન તેમજ જુગાર માટે ઉપયોગમાં લેવાયેલા ટુ-વ્હીલર સહિતની વિવિધ વસ્તુઓનો સમાવેશ થાય છે.
પોલીસે તમામ આરોપીઓ સામે સંબંધિત કલમો હેઠળ ગુનો નોંધી વધુ તપાસ શરૂ કરી છે. સાથે જ આ જુગાર પ્રવૃત્તિ સાથે અન્ય કોઈ વ્યક્તિની સંડોવણી છે કે નહીં અને આ પ્રકારની ગેરકાયદેસર પ્રવૃત્તિ કેટલા સમયથી ચાલી રહી હતી તે દિશામાં પણ તપાસ હાથ ધરવામાં આવી રહી છે.
