APMC પેઢીઓને સાયબર ફ્રોડના કેસમાં ફસાવવાની ધમકી આપી રૂ.30 લાખની ખંડણી માંગતા; રૂ.21 લાખમાં ‘સેટિંગ’ની ઓફરનો ખુલાસો
રાજકોટ: રાજકોટ ગ્રામ્ય પોલીસે ગોંડલ બી ડિવિઝન પોલીસ સ્ટેશનમાં નોંધાયેલા ખંડણીના ગુનાનો સફળતાપૂર્વક ભેદ ઉકેલી ‘ઓપરેશન મ્યુલ હન્ટ’ હેઠળ ત્રણ આરોપીઓની ધરપકડ કરી છે. પોલીસે સમગ્ર કાવતરાનો પર્દાફાશ કરીને વધુ તપાસ હાથ ધરી છે.
પોલીસ તપાસમાં સામે આવ્યું છે કે આરોપીઓએ APMC સાથે સંકળાયેલી પેઢીઓને સાયબર ફ્રોડના કેસમાં ફસાવવાની ધમકી આપી રૂ.30 લાખની ખંડણીની માંગ કરી હતી. ભયનો માહોલ ઉભો કરીને વેપારીઓ પાસેથી રૂપિયા પડાવવાનો પ્રયાસ કરવામાં આવ્યો હતો.
તપાસ દરમિયાન વધુ એક ચોંકાવનારો ખુલાસો થયો છે. આરોપીઓએ ખોટા કેસમાંથી બચાવવા અને મામલો દબાવી દેવાના બહાને રૂ.21 લાખમાં ‘સેટિંગ’ કરી આપવાની ઓફર પણ કરી હોવાનું પોલીસને જાણવા મળ્યું છે.
ટેક્નિકલ પુરાવા, ડિજિટલ તપાસ અને ગુપ્ત માહિતીના આધારે રાજકોટ ગ્રામ્ય પોલીસે સમગ્ર કાવતરાનો પર્દાફાશ કરીને ત્રણેય આરોપીઓને ઝડપી લીધા છે. પોલીસ હાલ આરોપીઓના નેટવર્ક, અન્ય સંડોવાયેલા શખ્સો અને આવા જ પ્રકારના અન્ય ગુનાઓમાં તેમની સંડોવણી અંગે વધુ તપાસ કરી રહી છે.
