તિરુપતિ બાલાજી મંદિરના પ્રસાદી લાડુમાં વપરાતા ઘીને લઈને તપાસમાં ગંભીર વિગતો સામે આવી હોવાનો EDનો દાવો છે. પ્રવર્તન નિદેશાલય અનુસાર, 2019થી 2024 દરમિયાન તિરુમાલા તિરુપતિ દેવસ્થાનમ (TTD)ને કથિત રીતે ભેળસેળયુક્ત ઘી સપ્લાય કરવામાં આવ્યું હતું. એજન્સીના જણાવ્યા મુજબ ઘીમાં રિફાઇન્ડ પામ ઓઈલ, પામ કર્નલ ઓઈલ અને પામોલિન જેવા વનસ્પતિ તેલનો ઉપયોગ કરવામાં આવ્યો હતો.
EDના દાવા મુજબ, આ વનસ્પતિ તેલના મિશ્રણને ઘી જેવું સ્વરૂપ આપવા માટે એમજી-90, મોનોગ્લિસરાઈડ્સ, માયવેસિટ સોફ્ટ 400 અને એસિટિક એસિડ એસ્ટર સહિતના વિવિધ કેમિકલ્સનો ઉપયોગ કરવામાં આવ્યો હતો. તપાસ એજન્સીએ આ સમયગાળા દરમિયાન આશરે રૂ.230 કરોડના શંકાસ્પદ ઘીના સપ્લાયની વિગતો સામે આવી હોવાનો દાવો કર્યો છે.
આ કેસમાં સુકૃતિ ફૂડ્સ પ્રાઈવેટ લિમિટેડના પ્રમોટર કૈલાશ ચંદ મંગલાની ધરપકડ કરવામાં આવી છે. EDના જણાવ્યા પ્રમાણે, તેમની કંપનીએ 2019થી 2024 દરમિયાન આશરે રૂ.96 કરોડનું કથિત ભેળસેળયુક્ત ઘી સપ્લાય કર્યું હતું. એજન્સી હવે સપ્લાય ચેઇન, નાણાકીય વ્યવહારો અને અન્ય સંબંધિત દસ્તાવેજોની તપાસ કરી રહી છે.
તિરુપતિ મંદિરનો લાડુ પ્રસાદ દેશ-વિદેશના કરોડો શ્રદ્ધાળુઓની આસ્થા સાથે જોડાયેલો છે. તેથી પ્રસાદમાં ઉપયોગમાં લેવાતા ઘીની ગુણવત્તા અંગેના આરોપોએ ફરી ગંભીર સવાલો ઊભા કર્યા છે. લાંબા સમય સુધી કથિત રીતે આ પ્રકારનું ઘી સપ્લાય કેવી રીતે થયું અને ગુણવત્તા ચકાસણીની પ્રક્રિયામાં કોઈ ખામી રહી કે નહીં તે અંગે તપાસ આગળ વધારી રહી છે.
જોકે, ઘીમાં ભેળસેળ અને સપ્લાય સંબંધિત આ તમામ બાબતો EDના આરોપો અને તપાસના દાવાઓ પર આધારિત છે. આ આરોપોની અંતિમ કાનૂની સત્યતા અદાલતી પ્રક્રિયા બાદ જ નક્કી થશે.
