દુનિયાની બે મોટી ટેક કંપનીઓ વચ્ચે 3 વર્ષનો કરાર : એક ફોલ્ડિંગ ડિસ્પ્લે પેનલ માટે એપલ સેમસંગને 250 ડોલર ચૂકવશે
નવી દિલ્હી: એપલ અને સેમસંગ સ્માર્ટફોન માર્કેટમાં એકબીજાના હરીફ છે, પરંતુ ફોલ્ડેબલ iPhoneને લઈને એક રસપ્રદ માહિતી સામે આવી છે. એપલે તાજેતરમાં પોતાનો ફોલ્ડેબલ iPhone લોન્ચ કર્યો છે, પરંતુ આ ફોનમાં ઉપયોગમાં લેવાતી ફોલ્ડિંગ ડિસ્પ્લે પેનલ માટે એપલ સેમસંગ પર નિર્ભર હોવાનું અહેવાલોમાં સામે આવ્યું છે.
ડિજિટલ મીડિયા અહેવાલો મુજબ, એપલ અને સેમસંગ વચ્ચે ફોલ્ડિંગ ડિસ્પ્લે પેનલની સપ્લાય માટે ત્રણ વર્ષનો કરાર થયો છે. આ કરાર હેઠળ સેમસંગ એપલને ફોલ્ડેબલ iPhone માટે ડિસ્પ્લે પેનલ પૂરી પાડશે. એક પેનલની કિંમત આશરે 250 ડોલર હોવાનું જણાવવામાં આવી રહ્યું છે.
હરીફ કંપની, છતાં સૌથી મહત્વના પાર્ટ માટે સેમસંગનો સહારો
ફોલ્ડેબલ ફોનના ક્ષેત્રમાં સેમસંગે એપલ કરતાં ઘણો વહેલો પ્રવેશ કર્યો હતો. સેમસંગે પોતાના ફોલ્ડેબલ સ્માર્ટફોનની અનેક પેઢીઓ બજારમાં ઉતારી છે અને આ સેગમેન્ટમાં મજબૂત સ્થાન બનાવ્યું છે. હવે એપલ પણ ફોલ્ડેબલ iPhone સાથે સેમસંગને સીધી ટક્કર આપવા મેદાનમાં ઉતર્યું છે.
પરંતુ અહીં રસપ્રદ વાત એ છે કે સેમસંગ સામે સ્પર્ધા કરતી એપલ પોતાના ફોલ્ડેબલ iPhoneની મુખ્ય ડિસ્પ્લે માટે સેમસંગ પાસેથી જ પેનલ ખરીદી રહી છે. આ ભાગીદારી બંને કંપનીઓ વચ્ચેની સ્પર્ધા સાથે ટેક્નોલોજી ક્ષેત્રની પરસ્પર નિર્ભરતા પણ દર્શાવે છે.
ફોલ્ડિંગ ડિસ્પ્લેમાં સેમસંગનું વર્ચસ્વ
ફોલ્ડિંગ OLED ડિસ્પ્લેના ઉત્પાદન ક્ષેત્રે સેમસંગ ડિસ્પ્લે લાંબા સમયથી અગ્રણી કંપની રહી છે. પાતળી, ટકાઉ અને ઉચ્ચ ગુણવત્તાની ફોલ્ડિંગ સ્ક્રીન વિકસાવવામાં સેમસંગે નોંધપાત્ર અનુભવ મેળવ્યો છે.
ચીનની કંપનીઓ પણ હવે ફોલ્ડેબલ ડિસ્પ્લે માર્કેટમાં ઝડપથી આગળ વધી રહી છે, પરંતુ પ્રીમિયમ ફોલ્ડેબલ સ્માર્ટફોન માટે સેમસંગ હજુ પણ મહત્વપૂર્ણ સપ્લાયર તરીકે પોતાની સ્થિતિ જાળવી રહ્યું છે.
અલ્ટ્રા-થિન ગ્લાસમાં પણ સેમસંગની ટેક્નોલોજી
ફોલ્ડેબલ ફોનની સ્ક્રીનમાં અલ્ટ્રા-થિન ગ્લાસ (UTG) મહત્વપૂર્ણ ભૂમિકા ભજવે છે. સેમસંગ પોતાના ફોલ્ડેબલ ફોનમાં ડ્યુઅલ અલ્ટ્રા-થિન ગ્લાસનો ઉપયોગ કરે છે. આ ટેક્નોલોજીની સપ્લાય ચેઇનમાં દક્ષિણ કોરિયાની કંપનીઓ પણ સામેલ છે.
હવે એપલના ફોલ્ડેબલ iPhoneમાં પણ આવી જ ટેક્નોલોજી જોવા મળી રહી છે. આગામી ત્રણ વર્ષ સુધી સેમસંગ દ્વારા ડિસ્પ્લે પેનલ સપ્લાય કરવાની વાત સામે આવતા એપલના નવા ફોલ્ડેબલ iPhoneમાં સેમસંગની ભૂમિકા વધુ મહત્વપૂર્ણ બની છે.
એપલ-સેમસંગની સ્પર્ધામાં નવો વળાંક
ફોલ્ડેબલ ફોન માર્કેટમાં એપલ અને સેમસંગ વચ્ચે હવે સીધી ટક્કર જોવા મળશે. પરંતુ એક તરફ બંને કંપનીઓ ગ્રાહકો માટે સ્પર્ધા કરશે અને બીજી તરફ એપલના ફોલ્ડેબલ iPhone માટે સેમસંગ જ મહત્વપૂર્ણ ડિસ્પ્લે સપ્લાયર રહેશે.
આથી ટેકનોલોજી માર્કેટમાં આ ભાગીદારીને ‘હરીફ પણ અને સપ્લાયર પણ’ તરીકે જોવામાં આવી રહી છે.
