ભારતમાં ખાંડની ઉપલબ્ધતા અને ભાવને લઈને તંગી સર્જાઈ છે ત્યારે પાકિસ્તાનની સુગર મિલોએ ભારતને ખાંડ વેચવાની તૈયારી દર્શાવી છે. પાકિસ્તાન સુગર મિલ એસોસિએશનના જણાવ્યા મુજબ દેશમાં સુગર મિલો પાસે 21.8 લાખ ટન ખાંડનો વધારાનો સ્ટોક પડ્યો છે.
ખાંડનો મોટો જથ્થો વેચાયા વગર પડ્યો હોવાથી મિલોના નાણાં સ્ટોકમાં ફસાઈ ગયા છે. આવી સ્થિતિમાં જો પાકિસ્તાન સરકાર ભારતને ખાંડની નિકાસ કરવાની મંજૂરી આપે તો સુગર મિલોને મોટી આર્થિક રાહત મળી શકે છે.
પાકિસ્તાની સુગર મિલ એસોસિએશનનું કહેવું છે કે અન્ય દેશોની સરખામણીએ પાકિસ્તાનથી ભારત સુધી ખાંડ મોકલવાનો પરિવહન ખર્ચ ઓછો રહેશે. તેથી ભારતને નિકાસ કરવાથી પાકિસ્તાનની મિલોને વધારાનો સ્ટોક ઘટાડવામાં મદદ મળી શકે છે.
જોકે, પાકિસ્તાન સરકાર નિકાસની મંજૂરી આપે તો પણ ભારત પાકિસ્તાન પાસેથી ખાંડ ખરીદશે કે નહીં તે મોટો પ્રશ્ન છે. હાલ બંને દેશો વચ્ચે દ્વિપક્ષીય વેપાર લગભગ સંપૂર્ણપણે બંધ છે અને પાકિસ્તાનથી ભારતમાં સામાન્ય આયાત થતી નથી.
પાકિસ્તાનમાં ખાંડનો ઘરેલું વપરાશ દર મહિને આશરે 5.50 લાખ ટન છે, જ્યારે મિલો પાસે 21.8 લાખ ટનનો સ્ટોક છે. આ વધારાનો જથ્થો ખપાવવા માટે પાકિસ્તાની મિલો હવે ભારત જેવા મોટા બજાર તરફ નજર કરી રહી છે.
