દિલ્હી હાઈકોર્ટના આદેશ બાદ લિક્વિડેશન પ્રક્રિયા અમલમાં; UPI, QR પેમેન્ટ અને અન્ય ડિજિટલ સેવાઓ પર કોઈ અસર નહીં
નવી દિલ્હી: દિલ્હી હાઈકોર્ટના આદેશ બાદ પેટીએમ પેમેન્ટ બેંકને બંધ કરવાની પ્રક્રિયા શરૂ કરવામાં આવી છે. જોકે, પેટીએમનો ઉપયોગ કરતા કરોડો ગ્રાહકો માટે રાહતના સમાચાર એ છે કે પેટીએમ એપ અને તેની ડિજિટલ પેમેન્ટ સેવાઓ અગાઉની જેમ જ ચાલુ રહેશે. બેંકની કામગીરી બંધ થશે, પરંતુ એપની સામાન્ય સેવાઓ પર તેની કોઈ સીધી અસર પડશે નહીં.
ભારતીય રિઝર્વ બેંક (RBI)ના નિર્ણય અનુસાર એસબીઆઈના ભૂતપૂર્વ અધિકારી ગિરીકુમાર એમ. નાયરને પેટીએમ પેમેન્ટ બેંકના લિક્વિડેટર તરીકે નિયુક્ત કરવામાં આવ્યા છે. 8 જુલાઈ, 2026થી તેઓ બેંકના તમામ નાણાકીય, વહીવટી અને કાયદાકીય કાર્યોનું સંચાલન સંભાળશે.
ગ્રાહકો માટે મહત્વની માહિતી
- જમા રકમ સુરક્ષિત: પેટીએમ પેમેન્ટ બેંકમાં રહેલી ગ્રાહકોની તમામ જમા રકમ સુરક્ષિત રહેશે. લિક્વિડેશન પ્રક્રિયા પૂર્ણ થયા બાદ નિયમ મુજબ ગ્રાહકોને રકમ પરત મળશે.
- પેટીએમ એપ ચાલુ રહેશે: UPI, QR કોડ પેમેન્ટ, મોબાઇલ રિચાર્જ, બિલ પેમેન્ટ સહિતની તમામ સામાન્ય સેવાઓમાં કોઈ ફેરફાર નહીં થાય.
- અન્ય બિઝનેસ સેવાઓ પર અસર નહીં: પેટીએમ સાઉન્ડબોક્સ, કાર્ડ મશીન, પેમેન્ટ ગેટવે, પેટીએમ ગોલ્ડ અને પેટીએમ મની જેવી સેવાઓ પણ નિયમિત રીતે ચાલુ રહેશે.
- ફાસ્ટેગ અને વોલેટ: પેટીએમ પેમેન્ટ બેંક સાથે જોડાયેલા જૂના ફાસ્ટેગ અને વોલેટ અગાઉથી જ બંધ કરવામાં આવ્યા છે. જો કોઈ બાકી રકમ હશે તો તે લિક્વિડેશન પ્રક્રિયા હેઠળ પરત આપવામાં આવશે.
- UPI વપરાશકર્તાઓ માટે સૂચના: જેમનું UPI અન્ય બેંક ખાતા સાથે જોડાયેલું છે તેમને કોઈ કાર્યવાહી કરવાની જરૂર નથી. પરંતુ જેમનું UPI સીધું પેટીએમ પેમેન્ટ બેંક સાથે લિંક છે તેમણે અન્ય બેંક સાથે UPI ફરીથી લિંક કરવું પડશે.
- રોકાણકારો પર કોઈ અસર નહીં: પેટીએમ પેમેન્ટ બેંક શેરબજારમાં લિસ્ટેડ કંપની ન હોવાથી આ નિર્ણયની સામાન્ય રોકાણકારો પર કોઈ સીધી અસર નહીં થાય.
પેટીએમએ ગ્રાહકોને વિશ્વાસ આપ્યો છે કે પેમેન્ટ બેંકની લિક્વિડેશન પ્રક્રિયા દરમિયાન પણ એપની ડિજિટલ સેવાઓ સરળતાથી ચાલુ રહેશે અને દૈનિક નાણાકીય વ્યવહારોમાં કોઈ વિક્ષેપ આવશે નહીં.
