ગેરેજની આડમાં ચાલતો હતો નશીલા પદાર્થોનો કારોબાર; NDPS એક્ટ હેઠળ કાર્યવાહી
અંજાર: કચ્છના અંજાર તાલુકાના વરસામેડી વિસ્તારમાં પોલીસે નશીલા પદાર્થોના ગેરકાયદે વેપાર સામે સફળ કાર્યવાહી કરી છે. બાતમીના આધારે કરાયેલા દરોડામાં પોલીસે 270 ગ્રામ ગાંજો જપ્ત કરી એક આરોપીની ધરપકડ કરી છે.
તપાસ દરમિયાન ખુલાસો થયો છે કે આરોપી પોતાના ગેરેજની આડમાં ગાંજાનું ગેરકાયદેસર વેચાણ કરતો હતો. પોલીસે સ્થળ પરથી ગાંજાનો જથ્થો કબજે કરીને આરોપીને કાયદેસરની કાર્યવાહી હેઠળ ઝડપી પાડ્યો હતો.
આરોપી સામે NDPS એક્ટ હેઠળ ગુનો નોંધી વધુ તપાસ શરૂ કરવામાં આવી છે. ગાંજાનો જથ્થો ક્યાંથી મંગાવવામાં આવતો હતો, કોને સપ્લાય કરવામાં આવતો હતો અને આ નેટવર્કમાં અન્ય કોણ સંડોવાયેલા છે તે અંગે પોલીસે તપાસ તેજ કરી છે.
