8 તાલુકામાં 100 ટકાથી વધુ વરસાદ, 8 તાલુકામાં હજુ 10 ટકા પણ નહીં; દક્ષિણ ગુજરાત સૌથી વધુ ભીનું, કચ્છ સૌથી પાછળ
ગાંધીનગર: ગુજરાતમાં ચોમાસું જોર પકડ્યું હોવા છતાં વરસાદનું વિતરણ હજુ પણ અસમાન રહ્યું છે. રાજ્યમાં અત્યાર સુધી સિઝનનો 52.03 ટકા સરેરાશ વરસાદ નોંધાયો છે, પરંતુ એક તરફ કેટલાક વિસ્તારોમાં અતિવૃષ્ટિ અને પૂર જેવી સ્થિતિ સર્જાઈ છે તો બીજી તરફ કેટલાક તાલુકાઓ હજુ પણ સારા વરસાદની રાહ જોઈ રહ્યા છે.
સ્ટેટ ઇમરજન્સી ઓપરેશન સેન્ટરના આંકડા મુજબ રાજ્યમાં સરેરાશ 908.88 મીમી સામે 472.85 મીમી વરસાદ નોંધાયો છે. રાજ્યના 8 તાલુકાઓમાં સિઝનનો 100 ટકાથી વધુ વરસાદ નોંધાઈ ચૂક્યો છે. તેમાં ઉમરગામ, ચીખલી, ખેરગામ, પલસાણા, મહુવા, કામરેજ, માંગરોળ અને સાંતલપુરનો સમાવેશ થાય છે.
બીજી તરફ કચ્છ અને દેવભૂમિ દ્વારકાના વિસ્તારોમાં ચોમાસું હજુ પણ નબળું રહ્યું છે. અબડાસા, દ્વારકા, કલ્યાણપુર, ભાણવડ, ખંભાળિયા, પોરબંદર, અંજાર અને મુંદ્રા સહિતના 8 તાલુકાઓમાં હજુ સિઝનનો 10 ટકા વરસાદ પણ નોંધાયો નથી.
પ્રાદેશિક સ્તરે દક્ષિણ ગુજરાતમાં સૌથી વધુ 76.39 ટકા વરસાદ નોંધાયો છે, જ્યારે સૌરાષ્ટ્રમાં 43.33 ટકા, મધ્ય ગુજરાતમાં 43.21 ટકા, ઉત્તર ગુજરાતમાં 34.90 ટકા અને કચ્છમાં માત્ર 18.59 ટકા વરસાદ નોંધાયો છે. રાજ્યના 27 તાલુકાઓમાં 40 ઇંચથી વધુ વરસાદ, 33 તાલુકાઓમાં 20થી 40 ઇંચ, 113 તાલુકાઓમાં 10થી 20 ઇંચ અને 20 તાલુકાઓમાં માત્ર 2થી 5 ઇંચ વરસાદ નોંધાયો છે.
રાજકોટ જિલ્લામાં પણ વરસાદનું ચિત્ર અસમાન રહ્યું છે. જિલ્લામાં અત્યાર સુધી 36.76 ટકા સરેરાશ વરસાદ નોંધાયો છે. જામકંડોરણા તાલુકામાં સૌથી વધુ 51.25 ટકા વરસાદ નોંધાયો છે, જ્યારે વીંછીયામાં માત્ર 18.78 ટકા વરસાદ થતાં જિલ્લાની અંદર પણ વરસાદમાં મોટો તફાવત જોવા મળી રહ્યો છે. ગોંડલ, ધોરાજી અને જેતપુરમાં સરેરાશ કરતાં સારો વરસાદ નોંધાયો છે, જ્યારે અન્ય વિસ્તારો હજુ વધુ વરસાદની રાહ જોઈ રહ્યા છે.
હવામાન વિભાગના અનુમાન મુજબ આગામી દિવસોમાં રાજ્યના વિવિધ વિસ્તારોમાં વધુ એક સક્રિય વરસાદી રાઉન્ડની શક્યતા છે. જો આગાહી મુજબ વરસાદ વરસશે તો વરસાદની ખાધ ધરાવતા વિસ્તારોમાં પણ સ્થિતિમાં નોંધપાત્ર સુધારો થવાની સંભાવના છે.
