શિરડી: દેશના પ્રસિદ્ધ Shirdi Sai Baba Temple ખાતે ભક્તોને આપવામાં આવતા પ્રસાદને લઈને ચોંકાવનારો ખુલાસો સામે આવ્યો છે. અન્ન અને ઔષધ નિયમન વિભાગે હાથ ધરેલી કાર્યવાહી દરમિયાન આશરે 600થી 700 કિલો ભેળસેળયુક્ત અને હલકી ગુણવત્તાના પેંડાનો જથ્થો જપ્ત કરીને તેનો નાશ કરવામાં આવ્યો છે.
મળતી માહિતી મુજબ, પ્રસાદ તરીકે વેચાતા પેંડાની ગુણવત્તા અંગે તંત્રને સતત ફરિયાદો મળી રહી હતી. ભક્તોના આરોગ્ય સાથે ચેડાં થવાની આશંકાને ધ્યાનમાં રાખીને અધિકારીઓએ શિરડી વિસ્તારમાં આવેલી પેંડાની દુકાનો અને ઉત્પાદન એકમો પર અચાનક દરોડા પાડ્યા હતા.
તપાસ દરમિયાન કેટલાક સ્થળોએ શંકાસ્પદ ગુણવત્તાના માવામાંથી પેંડા તૈયાર કરવામાં આવતા હોવાની વિગતો સામે આવી હતી. ત્યારબાદ સંબંધિત જથ્થો જપ્ત કરીને તાત્કાલિક નાશ કરવામાં આવ્યો હતો.
સત્તાવાર સૂત્રોના જણાવ્યા અનુસાર, જિલ્લા વહીવટીતંત્રને મળેલી ફરિયાદોના આધારે આ કાર્યવાહી હાથ ધરવામાં આવી હતી. સંયુક્ત ટીમમાં અન્ન અને ઔષધ વિભાગ, નગરપાલિકા, પોલીસ તંત્ર અને અન્ય સંબંધિત વિભાગોના અધિકારીઓ સામેલ હતા.
શિરડી સાંઈબાબા મંદિર દેશ-વિદેશના કરોડો ભક્તોની આસ્થાનું કેન્દ્ર છે. દરરોજ મોટી સંખ્યામાં શ્રદ્ધાળુઓ અહીં દર્શન માટે આવે છે અને પ્રસાદ રૂપે પેંડાની ખરીદી કરે છે. આવી સ્થિતિમાં પ્રસાદની ગુણવત્તા જળવાઈ રહે તે માટે તંત્ર દ્વારા કડક દેખરેખ રાખવામાં આવી રહી છે.
અધિકારીઓએ જણાવ્યું છે કે ભવિષ્યમાં પણ આવી તપાસ ચાલુ રહેશે અને ભેળસેળ અથવા આરોગ્યને નુકસાન પહોંચાડે તેવી પ્રવૃત્તિઓ સામે કડક કાયદાકીય કાર્યવાહી કરવામાં આવશે. આ ઘટનાને પગલે વેપારીઓમાં પણ ચિંતા અને સતર્કતાનો માહોલ જોવા મળી રહ્યો છે.
