રાજકોટ મહાનગરપાલિકા (RMC)ની સ્ટેન્ડિંગ કમિટીની બેઠકમાં ખર્ચ ઘટાડવાના હેતુથી કેટલાક મહત્વપૂર્ણ નિર્ણયો લેવામાં આવ્યા છે. બેઠકમાં રજૂ થયેલી કુલ 24 દરખાસ્તોમાંથી 21 દરખાસ્તોને મંજૂરી આપવામાં આવી હતી, જ્યારે 2 મહત્વપૂર્ણ દરખાસ્તોને હાલ માટે પેન્ડિંગ રાખવાનો નિર્ણય લેવાયો હતો.
સ્ટેન્ડિંગ કમિટી સમક્ષ કુલ ₹89.36 કરોડની વિવિધ વિકાસલક્ષી દરખાસ્તો રજૂ કરવામાં આવી હતી, જેમાંથી આશરે ₹87 કરોડની દરખાસ્તોને મંજૂરી મળી છે. જોકે, રેસકોર્ષ રીંગ રોડ ફરતે લાઇટિંગ માટેની ₹2.30 કરોડની દરખાસ્તને હાલ માટે પેન્ડિંગ રાખવામાં આવી છે.
આ ઉપરાંત, શહેર માટે અર્બન ગ્રીનિંગ પોલિસી તૈયાર કરવાની દરખાસ્તને પણ મંજૂરી આપવામાં આવી નથી અને તેને વધુ વિચારણા માટે પેન્ડિંગ રાખવામાં આવી છે.
બીજી તરફ, કાલાવડ રોડ અને પેડક રોડ સ્થિત સ્વિમિંગ પુલોના સંચાલનને ખાનગી એજન્સીને સોંપવાની દરખાસ્તને સ્ટેન્ડિંગ કમિટીએ રદ્દ કરી દીધી છે.
RMCના આ નિર્ણયોને શહેરના ખર્ચ નિયંત્રણ અને વિકાસ કાર્યોમાં પ્રાથમિકતા નક્કી કરવાના પ્રયાસ તરીકે જોવામાં આવી રહ્યા છે.
